Abantu batari munsi ya 13 bapfuye nyuma yuko ku wa gatandatu nijoro imodoka y’ikamyo itwaye ibitoro ibirindutse igashya mu burengerazuba bwa Kenya.
Amakuru avuga ko iyo kamyo yakoze impanuka ubwo umushoferi wayo yageragezaga kwirinda kugongana n’indi kamyo mu muhanda ugendwa cyane hagati ya Kisumu na Busia.
Abantu bihutiye kugera ahabereye impanuka bitwaje amajerikani ngo bavome ku bitoro kuri iyo kamyo yari yabirindutse ubwo yaturikaga.
Abantu bagera kuri 11, barimo n’abana, barembeye mu (...)

Sponsored Ad

Abantu batari munsi ya 13 bapfuye nyuma yuko ku wa gatandatu nijoro imodoka y’ikamyo itwaye ibitoro ibirindutse igashya mu burengerazuba bwa Kenya.

Amakuru avuga ko iyo kamyo yakoze impanuka ubwo umushoferi wayo yageragezaga kwirinda kugongana n’indi kamyo mu muhanda ugendwa cyane hagati ya Kisumu na Busia.

Abantu bihutiye kugera ahabereye impanuka bitwaje amajerikani ngo bavome ku bitoro kuri iyo kamyo yari yabirindutse ubwo yaturikaga.

Abantu bagera kuri 11, barimo n’abana, barembeye mu bitaro nyuma yo kugira ubushye bukomeye.

Byafashe amasaha abiri kugira ngo abazimya umuriro bagere aho iyo mpanuka yabereye, hafi y’umujyi wa Malanga wo mu karere ka Siaya - ku ntera ya kilometero hafi 315 mu majyaruguru ashyira uburengerazuba bw’umurwa mukuru Nairobi.

Moreso Chacha, umukuru wa polisi aho impanuka yabereye, yagize ati: "Ntabwo twashoboye kubona imodoka izimya umuriro ivuye mu karere ka Siaya kuko iri i Nairobi".

Yavuze ko abazimya umuriro bavuye mu karere baturanye bakaza kubafasha.

Ikamyo itwaye amata yari irimo iva mu mujyi wa Busia, hafi y’umupaka na Uganda, yerekeza mu mujyi wa Kisumu, ubwo yagonganaga n’ikamyo itwaye ibitoro yajyaga mu kindi cyerekezo, nkuko umukuru wa polisi yabisobanuye.

Impanuka zo mu mihanda si ikintu kidasanzwe muri Kenya, aho amakamyo n’ibindi binyabiziga akenshi bigenda ku muvuduko mwinshi mu mihanda mito - bimwe nta n’amatara bicanye nijoro, nkuko bivugwa n’umunyamakuru wa BBC Mercy Juma uri i Nairobi.

Abantu hafi 3,000 bapfa buri mwaka muri Kenya bishwe n’impanuka zo mu mihanda.

BBC