Amashyirahamwe aharanira uburenganzira bw’abagore aratangaza ko imitwe yitwaje intwaro yafashe ku ngufu abagore barenga 100 muri teritware ya Rutshuru mu gihe cy’amezi 4 mu duce tuyobowe na M23.
Umutwe wa M23 uhakana wivuye inyuma uruhare rushinjwa abasirikare bayo muri ibyo bikorwa ahubwo ugashinja indi mitwe ya Nyatura na FDLR gufatanya n’ingabo za Kongo FARDC gukora ibyo bikorwa by’urugomo.
Ijwi rya Amerika rivuga ko ibi byaha byakorewe i Kishishe, Bunagana, Jomba, Kinyandonyi, Bambo (…)

Amashyirahamwe aharanira uburenganzira bw’abagore aratangaza ko imitwe yitwaje intwaro yafashe ku ngufu abagore barenga 100 muri teritware ya Rutshuru mu gihe cy’amezi 4 mu duce tuyobowe na M23.

Umutwe wa M23 uhakana wivuye inyuma uruhare rushinjwa abasirikare bayo muri ibyo bikorwa ahubwo ugashinja indi mitwe ya Nyatura na FDLR gufatanya n’ingabo za Kongo FARDC gukora ibyo bikorwa by’urugomo.

Ijwi rya Amerika rivuga ko ibi byaha byakorewe i Kishishe, Bunagana, Jomba, Kinyandonyi, Bambo ndetse na Rugari.

Umuvugizi w’uyu mutwe, Maj Willy Ngoma yabwiye itangazamakuru ko mu mateka ya M23 itigeze ifata ku ngufu ahubwo uyu ari umugambi ugamije kuyiharabika kuko aho ifata ibana neza n’abaturage.

Ati “Twebwe M23 twabaye mu nkambi zo muri Uganda imyaka ine yose kandi aho twabaga hari abakobwa beza b’Abanyankole ariko nta na rimwe Leta Uganda yigeze idushinja gufata ku ngufu abaturage bayo cyane cyane abakobwa birasekeje cyane iyo Leta ya Kinshasa ihishira ibikorwa bibi bya FARDC na Nyatura, Mai Mai n’abandi kuko aribo bari gufata ku ngufu abo bakobwa bose. Bakabyegeka kuri M23, ntitwakwigera na rimwe dufata abagore, aho turi hose tubana neza n’abaturage.”

Ibi birego byo gufata ku ngufu bizamutse mu gihe n’ubundi M23 itavuga rumwe na RDC ku bijyanye n’ubwicanyi bivugwa ko bwabereye mu gace ka Kishishe bukibasira abasivile.