Umutwe witwaje intwaro wa M23 watangaje ko kuri uyu wa 16 Mutarama 2024, Ingabo za Repubulika Iharanira Demokarasi ya Congo zishe abakomanda babiri bawo mu bitero bikaze byakoreshejwe utudege tutagira abapilote [drone],i Kitchanga.

Sponsored Ad

Ikinyamakuru Chimpreports nicyo cyabanje gutangaza ko FARDC yishe abasirikare babiri bakomeye ba M23 barimo Col. Castro Elise Mberabagabo ushinzwe ibijyanye n’ubutasi no gutsura umubano.

Ibi byabereye mu gitero cy’indege zitagira abapilote cyagabwe ku mutwe wa M23 mu burasirazuba bwa DR Congo,i Kitchanga, muri Masisi.

Umuvugizi wa M23 ku rwego rwa politiki wa M23, Lawrence Kanyuka, mu gitondo cy’uyu wa 17 Mutarama yemeje aya makuru, mu itangazo yasinyeho rigira ati “Leta ya Kinshasa yongeye kurenga ku masezerano y’ihagarikwa ry’imirwano kuri uyu wa 16 Mutarama 2024, igaba ibitero ku ngabo zacu ziri ku rugamba, yica babiri muri bakomanda bacu.”

Ku mugoroba wo kuri uyu wa 16 Mutarama byavugwaga ko Umujyanama wa General Sultani Makenga, Colonel Erasto Bahati yakomerekeye muri iki gitero cya ‘drone’ cyagabwe muri Kitchanga.

Mu itangazo wasohoye,Umutwe wa M23 wateguje ko ugiye gusubiza amahitamo ya Leta ya Kinshasa yanze kubahiriza gahunda y’inzira y’amahoro, ikica abantu bayo babiri.

Yagize iti "Kubera ibyabaye,M23 yumvise neza ubutumwa bwoherejwe na leta ya Kinshasa kandi irasubiza uko bikwiriye.

Nyuma yo gupfusha abayobozi,M23 yitezweho gukaza urugamba na Leta ya RDC rwitezweho guhindura isura, kuko Ingabo za SADC zamaze kurwinjiramo.