Umutingito ukomeye wateye hagati muri Maroc mu ijoro ryakeye, uhitana abantu bagera ku 1,037, nk’uko bitangazwa na Ministeri y’ubutegetsi bw’igihugu .

Umubare w’abahitanywe n’umutingito wibasiye akarere k’imisozi miremire ya Atlas muri Maroke ukomeje kwiyongera.

Ministeri y’ubutegetsi bw’igihugu yatangaje ku gicamunsi cyo kuri uyu wa gatandatu ko abantu bagera kuri 1000 bapfuye.

Uyu mutingito wari ufite ingufu z’ibice 7 ku gipimo cya Richter. Niwo Mutingito wa mbere ukomeye ubaye muri Maroke.

Ubutegetsi bwasabye abaturage kwitabira gutanga amaraso yo kugoboka abantu benshi babarirwa mu magana bakiriwe mu bitaro bitandukanye bya Marrakech.

Ahabereye uyu mutingito ni mu misozi miremire izwi nka Haut Atlas/High Atlas, ku birometero 71 mu majyepfo ashyira uburengerazuba bw’Umujyi wa Marrakesh.

Uyu mutingito wabaye saa tanu n’iminota 11 z’ijoro (23:11) mu masaha yo muri icyo gihugu, ni ukuvuga saa sita n’iminota 11 z’ijoro ku masaha ya Kigali, haciye iminota 19 nabwo humvikana indi mitingito yoroheje dufite igipimo cya 4.9.

Itangazo rya mbere rya Minisiteri y’Ubutegetsi bw’igihugu rigira riti"Amakuru y’ibanze yerekana ko uyu mutingito wishe abantu 296 mu ntara no mu mijyi ya al-Haouz, Marrakesh, Ouarzazate, Azilal, Chichaoua na Taroudant".

Ryongeraho ko abandi bantu 153 bakomeretse bakaba bari mu bitaro.

Imibare ishobora kwiyongera, Minisiteri y’Umutekano muri Maroc yongeye kuvuga ko abantu 820 bamaze kunyekana ko bishwe n’umutingito.

Amashusho atashoboye guhinyuzwa yacishijwe ku rubuga rwa X ( rwahoze rwitwa Twitter) yerekana amazu yabomaguritse, ayandi arimo kuzungazunga, ibyasenyutse byuzuye imihanda. Abantu barimo barahunga n’umubabaro bamwe nabo bagenda baca mu bicu by’ivumbi.

Amazu amwe amwe yo mu mujyi wa Marrakesh yabomotse, nk’uko umwe mu basanzwe bahaba yabibwiye ibiro ntaramakuru Reuters.

Amashusho atari make kuri X yerekana amazu arimo gusenyukira hasi, ariko BBC dukesha iyi nkuru ntiyashoboye kumenya neza aho ari ho.

Bivugwa ko abaturage bafashe umwanzuro wo kuguma hanze y’inzu zabo mu gihe harimo kuba indi mitingito ikomeye ikurikiye uwa mbere.

Undi mugabo uba muri uwo mujyi wa kera yavuze ko yumvise “isi inyeganyega cyane” abona kandi “amazu arimo kugenda”.

Abdelhak El Amrani yabwiye ibiro ntaramakuru AFP ati "Abantu bose bari baguye igihumure kandi bafite ubwoba. Abana barimo kurira ababyeyi nabo bataye umutwe”.

Vladimir Putin w’Uburusiya, Perezida wa Turukiya, Recep Tayyip Erdogan na Perezida wa Ukraine, Volodymyr Zelensky bose bageneye ubutumwa abaturage ba Maroc mu rwego rwo kwifatanya na bo.

Ubwongereza na Israel byiyemeje kuba byafasha Maroc mu bufasha bwose yakenera.

Minisitiri w’Intebe wa Israel, Benjamin Netanyahu yavuze ko yatanze amabwiriza yo gufasha abaturage ba Maroc mu bufasha bwose baba bakeneye.

Umuryango wa Africa yunze Ubumwe, AU na wo wagaragaje ko wumva uburibwe bwatejwe n’ingaruka z’umutingito.