Ubwato bw’intambara bwa Misiri bwagejeje ikiciro cya kabiri cy’intwaro muri Somalia zirimo n’imbunda nini zirasa indege na za muzinga, nk’uko abategetsi ku cyambu babitangaje ku wa mbere.

Sponsored Ad

Ni igikorwa gishobora kongera umwuka mubi hagati y’ibi bihugu byombi na Ethiopia.

Ubucuti hagati ya Misiri na Somalia bwariyongereye muri uyu mwaka kuko bisangiye kutizera Ethiopia.

Ibi byatumye Cairo yohereza indege nyinshi zuzuye intwaro i Mogadishu muri Somalia nyuma y’uko muri Kanama (8) ibi bihugu byombi bisinye amasezerano y’ubufatanye mu bya gisirikare n’umutekano.

Ethiopia yarakaje Mogadishu ubwo yemeraga amasezerano y’ibanze muri Mutarama(1) yo gufatanya n’akarere ka Somaliland gashaka kwigenga kuri Somalia, amasezerano yo gukodesha Ethiopia ubutaka bwo ku nyanja, na yo ikaba yakwemera ubwigenge bwa Somaliland.

Misiri, imaze imyaka itarebana neza na Ethiopia kubera uburyo Addis Ababa yubatse urugomero rutura ku ruzi rwa Nili, na yo yamaganye iyo mikoranire ya Ethiopia na Somaliland.

Ubwo bwato bw’intambara bwa Misiri bwatangiye gupakurura intwaro ku cyumweru, nk’uko umwe mu badipolomate asubirwamo n’ibiro ntaramakuru Reuters abivuga.

Abashinzwe umutekano bafunze inzira y’ibanze n’imihanda iyishamikiyeho ku cyumweru no ku wa mbere ubwo imodoka nyinshi zitwaye izi ntwaro zazivanaga ku cyambu zizijyana ku nyubako ya minisiteri y’ingabo n’ibigo bya gisirikare biri hafi, nk’uko abakozi babiri bo ku cyambu n’abasirikare babiri babibwiye Reuters.

Nasra Bashir Ali, umukozi mu biro bya Minisitiri w’Intebe wa Somalia Hamza Abdi Barre, yatangaje ifoto ku rubuga X igaragaza Minisitiri w’Ingabo Abdulkadir Mohamed Nur arimo kureba izi ntwaro ziri gupakururwa mu bwato.

Somaliland yavuze impungenge itewe n’izo ntwaro mu gihe zaba zigeze mu maboko mabi, harimo umutwe wa al-Shabab, nk’uko babitangaje mu itangazo rya minisiteri yabo y’ububanyi n’amahanga.

Naho Minisiteri y’ububanyi n’amahanga ya Misiri ku wa mbere yasohoye itangazo ivuga ko “Inkunga ya gisirikare ya Misiri yoherejwe n’ubwato yageze mu murwa mukuru Mogadishu wa Somalia ngo ifashe kubaka ubushobozi bw’igisirikare cya Somalia”.

Ku cyumweru, itangazamakuru mu Misiri ryatangaje ko Ambasade ya Misiri i Mogadishu yaburiye abaturage ba Misiri kutajya mu karere ka Somaliland, kubera ikibazo cy’umutekano muri ako gace.

Ethiopia ifite abasirikare bagera ku 3,000 bari muri Somalia mu ngabo ziri mu butumwa bw’amahoro bw’Ubumwe bwa Afurika buzwi nka ATMIS bwo kurwanya imitwe yitwaje intwaro, mu gihe kandi hari n’abandi bari hagati ya 5,000 na 7,000 bari yo ku masezerano ya leta zombi.

Somalia yavuze ko amasezerano ya Ethiopia na Somaliland ari igitero ku busugire bwayo kandi ko ishaka ko ingabo za Ethiopia zose ziva muri Somalia bitarenze uyu mwaka, keretse gusa Addis Ababa iretse ayo masezerano.

Mu gihe gito gishize Ethiopia yavuze ko itazareberera mu gihe “abandi” barimo gufata ingamba zo guhungabanya akarere.