Nibura abantu 21 baguye mu mvururu nyuma y’uko Urukiko rushinzwe Kurinda Itegeko Nshinga rwa Mozambike ku wa Mbere rwemeje ko ishyaka rimaze igihe kirekire riri ku butegetsi Frelimo ryatsinze amatora ya perezida, nk’uko minisitiri w’umutekano mu gihugu yabitangaje ku wa Kabiri.

Icyemezo cyafashwe n’Urukiko rushinzwe Kurinda k’Itegeko Nshinga rwa Mozambique cyateje imyigaragambyo mishya mu gihugu cyose y’imitwe itavuga rumwe n’ubutegetsi n’abayoboke babo bavuga ko amajwi yatangajwe ari impimbano.

Minisitiri w’umutekano, Pascoal Ronda, yatangarije televiziyo ya leta, TVM, ati: “Ingabo zongera umubare mu bice bimwe bikomeye kandi by’ingenzi.” Ni nyuma yo gutangaza ko abantu 78 bamaze gutabwa muri yombi kandi ingamba z’umutekano zakajijwe mu gihugu hose.

Ishyaka rya FRELIMO ryakomeje gushinjwa inshuro nyinshi n’abatavuga rumwe n’ubutegetsi n’indorerezi z’amatora gukora uburiganya mu matora ariko iri shyaka rihakana ibi birego.

Hagati aho, Umukuru w’abatavuga rumwe n’ubutegetsi muri Mozambique, Venâncio Mondlane, yatangaje ko azishyiraho nka perezida ku itariki ya 15 Mutarama 2025 nyuma yo kwanga ko yatsinzwe mu matora ya perezida.