Abakuru b’agatsiko ka gisirikare kahiritse ubutegetsi muri Niger bavuga ko badashobora kwemera uruzinduko rwo ku rwego rwo hejuru rw’abadiplomate bo mu muryango w’ubukungu w’ibihugu byo muri Afurika y’uburengerazuba (CEDEAO/ECOWAS) kuko hari ibyago ku mutekano b’abo bashyitsi.

Intumwa zo muri CEDEAO, umuryango w’Ubumwe bw’Afurika (AU/UA) n’umuryango w’abibumbye (ONU/UN) zari zitezwe kwerekeza muri Niger mu ndege ku wa kabiri.

Ariko abakuru b’agatsiko kahiritse ubutegetsi muri icyo gihugu babwiye CEDEAO ko ibihano uwo muryango wafatiye Niger n’inkeke yo kugabwaho igitero na CEDEAO byateje uburakari mu baturage, ko rero izo ntumwa zidashobora kwakirwa mu ituze no mu mutekano.

Bongeyeho ko imipaka ya Niger yo ku butaka no mu kirere ifunze.

Amakuru ava mu murwa mukuru Niamey wa Niger avuga ko abantu benshi bakiriye neza iryo hirikwa ry’ubutegetsi bavuga ko ari impinduka nziza, nubwo Perezida wahiritswe, Mohamed Bazoum, yari yatowe mu buryo bunyuze muri demokarasi.

Amerika yaburiye ko hari ibyago ko itsinda rya Wagner ry’abacanshuro b’Abarusiya rizafatirana uko ibintu bimeze ubu muri Niger, rikabyungukiramo.

BBC