Ushingiye ku bawuhaye amakuru "bo kwizerwa", Umuryango w’Abibumbye (ONU) uvuga ko abantu barenga 400 bishwe n’umutwe witwara gisirikare wa RSF (Rapid Support Forces) mu bitero uherutse kugaba mu karere ka Darfur ko muri Sudani.

Sponsored Ad

Mu cyumweru gishize, RSF yagabye igitero gikomeye cyo ku butaka no mu kirere ku nkambi z’impunzi zikikije umujyi wa El-Fasher, mu kugerageza gufata uwo murwa mukuru wa leta wa nyuma muri Darfur ugenzurwa n’igisirikare cya Sudani bahanganye.

Izo mpande zombi ziri mu ntambara yo kurwanira ubutegetsi kuva muri Mata (4) mu mwaka wa 2023. Ibi byateje amakuba ya mbere akomeye ku isi abangamiye imibereho y’abaturage ndetse byatumye abantu babarirwa muri za miliyoni bata ingo zabo.

ONU yavuze ko yagenzuye ubwicanyi bwakorewe abantu 148 hagati yo ku wa kane no ku wa gatandatu, ariko iburira ko umubare w’abishwe ari munini cyane kurushaho.

Abategetsi bo ku rwego rwo hejuru bo mu mahanga barahurira i London uyu munsi baganire ku ntambara yo muri Sudani, kuri uyu munsi hibukwa imyaka ibiri ishize iyo ntambara itangiye.

Umuvugizi wa ONU Ravina Shamdasani yabwiye BBC ko igenzura ryabo rigikomeje ndetse ko umubare wabo utarimo abishwe ku cyumweru.

Shamdasani yagize ati: "Abaduhaye amakuru bo kwizerwa bavuze ko abantu barenga 400 bishwe."

ONU yavuze ko abakozi nibura icyenda bakora ubutabazi bari muri abo bishwe.

Izo nkambi z’impunzi zikikije El-Fasher - inkambi ya Zamzam n’inkambi ya Abu Shouk - zicumbikiye by’igihe gito abantu barenga 700,000, benshi bakaba babayeho mu buryo bumeze nko kwicwa n’inzara.

Mu itangazo wasohoye ku wa gatandatu, umutwe wa RSF wavuze ko atari wo wagabye ibitero ku basivile ndetse ko ibikorwa by’ubwicanyi mu nkambi ya Zamzam byakozwe hagamijwe guharabika abarwanyi bawo.

Ku munsi wakurikiyeho, uwo mutwe wavuze ko warangije gukora "ibohora ryageze ku ntego" ry’iyo nkambi, uvuga ko wayatse igisirikare cya Sudani. RSF yashinje igisirikare cya Sudani gukoresha inkambi ya Zamzam nk’"ikigo cya gisirikare, n’abaturage b’abasivile b’inzirakarengane nk’abantu bo kwikingaho".

El-Fasher ni wo mujyi ukomeye wa nyuma wo muri Darfur ugenzurwa n’igisirikare ndetse umaze umwaka ugoswe na RSF. Kuri uyu wa kabiri, intambara yo muri Sudani yinjiye mu mwaka wayo wa gatatu.

Volker Türk, umukuru w’ishami rya ONU ryita ku burenganzira bwa muntu, yasabye impande zose ziri mu ntambara "kwiyemeza bundi bushya gufata ingamba zifatika zerekeza ku gucyemura intambara".

Mbere y’inama iteganyijwe kubera i London mu Bwongereza kuri uyu wa kabiri yo kuzirikarana ku myaka ibiri iyi ntambara imaze, Minisitiri w’intebe w’Ubwongereza David Lammy yatangaje imfashanyo y’ibiribwa n’indi mfashanyo yose hamwe ifite agaciro ka miliyoni 120 z’amapawundi (angana na miliyari 228FRW) igenewe Sudani.

Yavuze ko umutekano wa Sudani ari "ingenzi cyane ku mutekano w’igihugu cyacu".

Ubwongereza burayobora iyo nama bufatanyije n’umuryango w’Ubumwe bw’Afurika n’umuryango w’Ubumwe bw’Uburayi.