skol

Perezida Putin yemeza ko ibihano byafatiwe Uburusiya birimo ’ubusazi kandi bitatekerejweho’

Amakuru   Yanditswe na: Dusingizimana Remy 18 June 2022

Perezida w’Uburusiya Vladimir Putin yavuze ko ibihano ibihugu byo mu burengerazuba byafatiye Uburusiya nyuma y’igitero cyabwo kuri Ukraine ari "ubusazi kandi ntibyatekerejweho".

Avugira mu ihuriro mu mujyi wa St Petersburg, yavuze ko "igitero gikaze cy’ubukungu cyabagwe ku Burusiya kuva cyatangira nta mahirwe cyagize yo gutsinda".

Yavuze ko ibyo bihano "byangiza kurushaho" ababifashe.

Ibihugu byo mu burengerazuba (Uburayi n’Amerika) bimaze igihe bishaka uburyo byahana Uburusiya ariko nanone ibi ntibihungabanye ubukungu bwabyo.

Ariko, avugira mu nama mpuzamahanga ngarukamwaka y’ubukungu mu mujyi wa St Petersburg, Perezida Putin yavuze ko umuryango w’Ubumwe bw’Uburayi (EU/UE) ushobora guhomba arenga miliyari 400 z’amadolari y’Amerika kubera ibihano wafatiye Uburusiya.

Yavuze ko gutakaza agaciro kw’ifaranga birimo kwiyongera mu bihugu 27 bigize EU kandi ko inyungu za nyazo z’abaturage b’i Burayi zirimo gushyirwa ku ruhande (kwirengagizwa) - ariko ntiyasobanuye icyo ibyo bivuze.

Ariko abategetsi bwite bo muri leta ye baburiye ko ubukungu bw’Uburusiya burimo kwangirika bikomeye kubera ibihano.

Guverineri wa Banki Nkuru y’Uburusiya Elvira Nabiullina ku wa kane yatangaje kuri Twitter ko "15% by’umusaruro mbumbe [GDP/PIB] w’igihugu" bishyizwe ku nkeke n’ibihano by’amahanga.

Nabiullina yanabaye nk’udafite icyizere ko ubukungu bw’Uburusiya bushobora kuzanzamuka vuba aha, abwira abitabiriye iyo nama i St Petersburg ko "biraboneka kuri buri wese ko butazaba nkuko bwari bumeze mbere".

Yagize ati: "Ibintu byo hanze [y’igihugu] byarahindutse by’igihe kirekire rwose, niba ahubwo atari iby’igihe cyose".

Ku wa gatanu, umukuru wa banki ya mbere ikomeye mu Burusiya, Sberbank, yaburiye ko bishobora gufata imyaka irenga 10 kugira ngo ubukungu bw’Uburusiya busubire ku kigero bwari buriho mu mwaka wa 2021.

Ariko Putin yashatse kugaragaza ko afite icyizere, ndetse asaba abacuruzi bakomeye bo mu Burusiya gukomeza gukorera mu gihugu.

Ni mu gihe hari amakuru avuga ko umubare ukomeje kwiyongera w’abafite ubucuruzi mu Burusiya, barimo guha ikindi cyerekezo ubucuruzi bwabo bakibanda ku bucuruzi bwo hanze.

Putin yagize ati: "Mushore imari hano. Mu nzu yawe bwite haba hari umutekano kurushaho. Abatarashatse kumva ibi batakaje za miliyoni mu mahanga".

Putin, w’imyaka 69, yanavuze ku bwoba butewe n’amakuba ku isi ashingiye ku ibura ry’ibiribwa yatewe n’intambara ikomeje muri Ukraine.

Yavuze ko Uburusiya bushobora kongera cyane ibinyampeke n’ifumbire bwohereza mu mahanga.

Yavuze ko ibinyampeke byonyine Uburusiya bwohereza mu mahanga bishobora kwiyongera bikagera kuri toni miliyoni 50.

Ukraine - hamwe n’Uburusiya - ni kimwe mu bihugu bya mbere ku isi bihinga ibinyampeke byinshi, ariko imaze igihe idashobora kubyohereza mu mahanga kubera ko Uburusiya bwagose ibyambu (ibivuko) byayo byo ku nyanja ya Black Sea.

Ku wa gatanu, imirwano ikarishye yarakomeje mu mujyi wa Severodonetsk wo mu burasirazuba bwa Ukraine.

Gufata Severodonetsk - hamwe n’umujyi byegeranye wa Lysychansk - hashize ibyumweru ari intego y’ingenzi y’abasirikare b’Uburusiya.

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Abasirikare b’Uburusiya bafashwe amashusho bari kwiba ibinyampeke bya...

Iperereza rya BBC ryabonye gihamya ko abasirikare b’Uburusiya bigaruriye...
27 June 2022 0

Nigeriya:Umuturage yahawe ububasha bwo kujya yirindira umutekano

Abategetsi bo muri leta ya Zamfara mu majyaruguru ashyira uburengerazuba...
27 June 2022 0

M23 yabihije ibirori by’AbanyeCongo bishimiraga ko Gen Makenga uyiyobora...

Ku munsi w’ejo hiriwe ibihuha muri Congo ko ingabo za FARDC zishe Gen...
27 June 2022 0

Gen.Chico ushinzwe abarinda Tshisekedi yarashwe na M23 yari yarahiriye...

Gen.Chico Tshitambwe wari umuyobozi w’abajepe barinda Perezida Tshisekedi...
26 June 2022 0

Umubare w’Abanyamahanga bari kurwanira Ukraine wamenyekanye

Abarwanyi b’Abanyamahanga bari gufasha Ukraine guhangana n’Uburusiya bagera...
25 June 2022 0

RDC: Mu ijwi riranguruye Abajepe basabye Perezida Tshisekedi kubaha intwaro...

Abarinda Perezida Felix Tshisekedi wa Repubulika ya Demokarasi ya Kongo...
24 June 2022 2