Ishami ry’Umuryango w’Abibumbye (ONU) rishinzwe ubutabazi (OCHA) ryatangaje ko abantu hafi 210,000 bakeneye ubufasha

Sponsored Ad

Ishami ry’Umuryango w’Abibumbye (ONU) rishinzwe ubutabazi (OCHA) ryatangaje ko abantu hafi 210,000 bakeneye ubufasha, abo bakaba barimo 170,000 bavuye mu byabo kubera imirwano hagati y’umutwe wa M23 n’ingabo za leta mu burasirazuba bwa RD Congo.

Hashize amezi abiri inyeshyamba za M23 zigenzura ibice bimwe bya teritwari ya Rutshuru y’intara ya Kivu ya ruguru, harimo n’umujyi muto wa Bunagana uri ku mupaka bihana na Uganda.

Ivuga kandi ko hafi 40% by’abavuye mu byabo bo baba ku bigo rusange nk’insengero, amashuri, stade, n’ahandi hakira abantu muri rusange.

Iri shami rya ONU rivuga ko kuva mu ntangiriro z’uku kwezi kwa Kanama abantu bagera ku 20,000 bavuye mu byabo mu gace ka Rubare no mu mujyi muto wa Rutshuru kubera imirwano ya M23 n’ingabo za leta muri iyi teritwari ya Rutshuru.

Mu mirwano yashyamiranyije M23 n’ingabo za leta mu cyumweru gishize, izi nyeshyamba zashinjwe kurasa zikangiza urugomero rw’amashanyarazi rwa parike ya Virunga aha muri Rutshuru.

Izi nyeshyamba zahakanye ibyo birego, zivuga ko “nta shingiro bifite”.

Iyo mirwano yo mu cyumweru gishize abaturage baho bavuze ko yiciwemo abagera kuri batandatu abandi benshi bagakomereka.

OCHA ivuga ko bariya bantu bavuye mu byabo “bakeneye ibintu byinshi” n’ubwo hari abagiraneza bakomeje kubagezaho ubufasha.

OCHA ivuga ko “kuva tariki 11 Kanama (8) kugeza ku ya 21 Kanama, ishami rya ONU rishinzwe ibiribwa ku isi, PAM, ryahaye ibiribwa abarenga 44,000 muri Rutshuru”.
BBC