Ishami rya ONU rishinzwe kurengera impunzi HCR riravuga ko kugeza kuri uyu wa kabiri ribarura abantu ibihumbi 11 bambutse umupaka bagahungira muri Uganda ibitero by’inyeshyamba zateye Rutshuru,guverinoma ya RDC ivuga ko ari M23.Izo mpunzi zicumbikiwe ahitwa Nyakabande.

Sponsored Ad

Umuvugizi w’umukuru w’intara ya Kivu ya ruguru, jenerari Sylvain Ekenge avuga ko bamwe batangiye guhunguka. Avuga ko "umubare ukiri muto, ariko ntekereza ko mu masaha ari imbere baza gutaha ku bwinshi".

Umuvuguzi wa HCR mu karere ka Afrika yo hagati, y’amajyepfo n’ihembe rya Afrika, Faith Kasima, avuga ko bigoye kumenya imibare mishya "ariko icyo tuzi n’uko abari bambutse umupaka bose bari ibihumbi 11".

Madame Kasina avuga ko icyo abo bantu babwira abakozi ba HCR ari uko bakeneye ahantu hatekanye.

Ati: "Benshi muri bo ubu nta ngamba zidahinduka bashobora gufata, yaba kuguma aha cyangwa gusubira inyuma."

Icyo bashaka muri uyu mwanya ni ahantu hatekanye no kubona imfashanyo -nk’ibyo kurya, ibyo kwifubika- ibyo nibyo HCR ifatanyije n’ubutegetsi bwa Uganda turimo turagerageza kubakorera"

Mu kiganiro na BBC, ku wa mbere, jenerari Ekenge yagize ati: "Nka saa yine z’ijoro, umutwe w’abarwanyi ba M23, cyangwa ibisigisigi byawo, wateye uturere twa Chanzo na Runyoni ufite umugambi wo gufata n’ibindi bice by’intara".

Jenerari Ekenge avuga ko abateye ari abo mu ishami ryategekwaga na Sultan Makenga.

Yavuze ko baje bava "mu karere k’imipaka itatu " kari hagati ya Congo, Uganda n’u Rwanda mu ishyamba rya Virunga".

Jenerari Ekenge avuga ko abateye baketse ko nta ngabo nyinshi za Congo zari zisanzwe muri ako gace kuko hari hatekanye ku buryo "bitari bikenewe ko hashyirwa ingabo nyinshi hafi y’umupaka w’ibihugu mufitanye umubano mwiza".

Avuga ko adashobora kwemeza niba abateye baje bava hakurya y’umupaka mu Rwanda cyangwa muri Uganda.

Ati "Gusa icyo twemeza n’uko ari aba M23. Ntibihisha. Barigaragaza, bashyize no ku mbuga nkoranyambaga ama video yabo".

Mu kiganiro cyo kuri uyu wa kabiri, jenerari Ekenge yavuze ko ubu ingabo za Congo zagaruje ibirindiro byose byari byatewe.

Yabwiye BBC Gahuzamiryango ati: "Kuva ejo mu masaha y’igitondo, ingabo zacu zagaruje ibirindiro byose. Ubu nizo zigenzura uruhande rwa Congo rw’umupaka na Uganda n’u Rwanda".

Ku kibazo cyo kumenya iyo abari bateye bagiye , jenerari Ekenge yasubije ati "hari aho bari bavuye, ni naho basubiye".

Hagati aho yavuze ko umukuru w’ingabo yagize ingendo muri Uganda no mu Rwanda, "aho niho bazavugana hakabonekae umucyo kuri icyo kibazo".

Ubuyobozi bw’umutwe wa M23 bwahakanye ko nta ruhare na rumwe rwagize mu gitero cyagabwe i Rutshuru ngo kuko bitumvikana.

Mu itangazo wasohoye ku mugoroba w’ejo, umutwe wa M23 uvuga ko umaze umwaka mu biganiro na leta ya Congo bigamije gutegurira abahoze ari abarwanyi bawo.

Iryo tangazo rikomeza rivuga ko mu gihe ibyo biganiro birimo kuba kandi ngo bikaba bigenda neza, nta kuntu M23 yaca inyuma ngo yiyononere.

BBC