Umutwe w’Ingabo z’Umuryango w’Iterambere ry’Ibihugu bya Afurika ishyira Amajyepfo zoherejwe muri Repubulika ya Demokarasi ya Congo (SAMIDRC) ugizwe n’ingabo zavuye mu bihugu bitatu, wabonye umuyobozi mushya.

Sponsored Ad

Colonel Thembekile Nqukuva wagizwe umuyobozi wa SAMIDRC avugwa n’Ibiro bishinzwe Amakuru rusange by’Ingabo za Afurika yepfo nk’umusirikare ufite uburambe wari waroherejwe mbere muri iki gihugu cya Afurika yo hagati gifite ibibazo by’umutekano byabaye karande. Bavuga ko ari "umuyobozi w’inararibonye wasohoje ubutumwa butandukanye mbere".

Yakiriwe muri DRC n’undi Munyafurika y’Epfo, Maj. Gen. Monwabisi Dyakopu, wari Umuyobozi wa SAMIDRC akaba na Komanda w’Ingabo za Afurika y’Epfo. Aka kanya kakoreshejwe mu kumenyesha abashya ibyo itsinda rya Afurika y’Epfo rikora mu nshingano zaryo, mu murwa mukuru wa Kivu y’Amajyaruguru, Goma no mu nkengero zawo muri Sake.

Izi Ngabo za Afurika y’Epfo mu butumwa bwa SAMIDRC zifatanya n’ingabo zavuye muri Malawi na Tanzaniya “kuva umusirikare wa mbere yahagera muri Mutarama 2024”. Ibi bihugu bitatu bya SADC ngo byakoranye na FARDC kugira ngo "birukane" inyeshyamba za M23 mu misozi ikikije Sake nk’uko tubikesha urubuga defenceweb.

Ibiro bishinzwe amakuru y’Igisirikare cya Afurika y’Epfo biti: “Nubwo hari ibibazo byinshi zahuye nabyo Ingabo za Repubulika ya Afurika y’Epfo zakoze amarondo akomeye ndetse n’ibikorwa bike zifatanije na FARDC. Muri uku gukurikirana ikibabaje ni uko Repubulika ya Afurika y’Epfo yatakaje bamwe mu Ngabo za SANDF. Ibi ariko ntibyaca intege izo ngabo zo gukomeza kurwana. Ubu hashize amezi 11 ku murongo kandi Abasirikare ba Repubulika ya Afurika y’Epfo baracyahagaze mu nshingano zabo, ”

Umusanzu wa Afurika y’Epfo muri SAMIDRC, nk’uko byatangajwe na Perezida Cyril Ramaphosa mu mpera z’umwaka ushize, ugizwe n’abasirikare 2 900 ku giciro cya miliyari 2.4 y’Ama-Rand yo kohereza ingabo mu mezi 12, biteganijwe ko bizarangira ku itariki ya 15 Ukuboza.