Inkongi y’umuriro yibasiye agace ka Lugushwa, gaherereye muri Teritwari ya Mwanga, muri Kivu y’Amajyepfo kuwa Kabiri ushize, itariki 18 Nyakanga, ihitana abantu batatu inasenya inzu zisaga 100 .

Nk’uko byatangajwe kuri uyu wa Kane n’ushizwe n’ibiro Ntaramakuru bya Congo, ACP, byavuganye na Mubirimbo Birimu, Perezida wa sosiyete sivile yaho, ngo icyateje iyi nkongi ntikirasobanuka neza. Uyu ariko yavuze ko byibuze amazu 110 yahiye agakongoka naho abantu batatu bakahasiga ubuzima.

Yagize ati "Imibare y’agateganyo y’iyi nkongi igaragaza ko abantu batatu bapfuye, byibuze amazu 110 yakongotse".

Aka gace gacukurwamo amabuye y’agaciro ka Lugushwa, gaherereye mu birometero birenga 200 uvuye Bukavu. Inkongi z’umuriro hatamenyekana ikizitera zagiye zumvikana mu byumweru bibiri bishize mu gice kinini cya Bukavu zikangiza imitungo myinshi ndetse zigahitana abantu.