Iyi mirwano ishyamiranyije abo mu bwoko bw’aba-Nande n’aba-Kumu yatangiye ku cyumweru. . Ejo, minisitiri w’umutekano muri guverinoma y’intara ya Kivu ya Ruguru, Jean-Bosco Sebishyimbo, yabwiye Ijwi ry’Amerika ko abapfuye bari bamaze kumenyekana bari babiri.

Uyu munsi,ikigo ntaramakuru Reuters cyo mu Bwongereza cyavuze ko umuvugizi w’iyi guverinoma y’intara yatanze indi mibare mishya ko abantu bishwe ari icumi. Abandi 34 barakomeretse. Amazu menshi nayo yaratwitswe.

Ibitero by’imitwe yitwara gisirikari n’imirwano hagati y’amoko atandukanye bimaze guhitana abantu barenga 300 kuva uyu mwaka utangiye mu gice cy’uburasirazuba bwa Repubulika ya demokarasi ya Congo.

Mu mijyi ya Beni, Butembo na Goma hashize iminsi hari imyigaragambyo yamagana ubwicanyi n’andi mabi akorwa n’imitwe yitwaje intwaro muri Beni kandi ako gace karimo ingabo nyinshi z’Umuryango w’Abibumbye (MONUSCO) zoherejwe kugarura amahoro.

Amashusho arimo inzu ziri gushya n’insoresore zifite ibirwanisho gakondo n’abasirikare bari hagati y’abashyamiranye, yakwiragijwe ku mbuga nkoranyambaga ku munsi w’ejo, yerekana ibi byabereye ahitwa Buhene mu gace ka Majengo hanze gato y’umujyi wa Goma.

Sebishyimbo yavuze ko guverineri w’intara ya Kivu ya ruguru n’abandi bategetsi bagiye i Buhene kuganira n’abahagarariye ayo moko yashyamiranye kugira ngo "ntitwongere kubona intambara z’amoko".

Ati: "Abakumu n’Abanande basanzwe bashyamirana mu tubazo tumwe na tumwe, [ubu rero] icyo nicyo cyabaye imbarutso, bituma hari abantu baramuka batwika amazu ariko ubu umwuka mwiza utangiye kugaruka."

Ku munsi w’ejo,Sebishyimbo yavuze ko muri iriya mijyi itatu ya Kivu ya ruguru abaturage bakomeje kwerekana uburakari mu myigaragambyo bavuga ko MONUSCO idakwiye kuba iri muri DR Congo.