Umwe mu bategetsi bakuru b’idini rya Isilamu yaraye yishwe arashwe n’abantu bataramenyekana mu majyepfo ya Repubulika ya Demokarasi ya Congo (DRC).

Sheikh Ali Amini yarashwe amasasu menshi ubwo yari ayoboye amasengesho y’ejo ku mugoroba mu musigiti mukuru w’umujyi wa Beni mu ntara ya Kivu ya Ruguru.

Ubu bwicanyi bwabaye hashize amasaha make Perezida Felix Tshisekedi w’icyo gihugu atangaje ko intara 2 zigoswe kuva ku wa gatanu.

Iki gitero cyakozwe mu gihe Abayisilamu bari mu kwezi kwa Ramadan, cyateye ubwoba bwinshi mu bantu.

Nta mutwe n’umwe uriyitirira ubu bwicanyi ariko byinshi mu bitero nk’ibi bimenyerewe gukorwa n’inyeshamba z’umutwe ADF zirwanya ubutegetsi bwa Uganda.

Umutwe wa Etat Islamique (ISIS) nawo wiyitiriye bimwe mu bitero byayo, ariko kugeza ubu ntiharamenyekana neza umubano ufitaniye na ADF.

Mbere y’uko iki gitero kiba, ibice bibiri byo muri ako karere byari byatewe n’abakekwa ko ari izo nyeshamba za ADF, zikomeje guhungabanya umutekano muri ako karere, kuva mu myaka ya 1990.

Ibi bibaye mu gihe abaharanira uburenganzira bwa muntu bafite impungenge ku mwanzuro wa Perezida Tshisekedi wo kugota intara 2 zirimo Kivu ya Ruguru na Ituri.

Bafite ubwoba ko igisirikare kigiye kongererwa ububasha mu gihe gishinjwa amateka mabi cyane y’ihohotera.

BBC