Umusirikare mukuru wa Somalia yatawe muri yombi n’Igipolisi nyuma yo gushoza intambara mu kabyiniro ko mu murwa mukuru bikarangira abantu batatu bapfuye abandi benshi bagakomereka nk’uko byatangajwe n’Igipolisi.

Gen. Sheegow Ahmed Ali n’itsinda bari kumwe ryahanganye n’igipolisi mu ntambara y’imbunda guhera mu ijoro ryo kuwa gatanu kugeza kuwa gatandatu nyuma ya saa sita nk’uko Igipolisi cyabitangaje cyemeza ko kuva ubwo yahise atabwa muri yombi mu gihe ategereje kugezwa mu rukiko.

Abandi bafatanwe nawe ni abasirikare be 25, aho ubu leta iteganya kumurega icyaha cyo kuvana abantu mu byabo. Abo ni abahunze ingo zabo nyuma yo kumva urusaku rw’amasasu menshi mu gace gasanzwe gatuje muri Mogadishu.

Nk’uko bitangazwa n’ibinyamakuru byo muri Somalia, birimo garoweonline, ngo iyi mirwano hagati y’umujenerali w’Igisirikare cya Somalia n’Igipolisi, yatangiye saa tatu z’ijoro ku isaha yo muri iki gihugu mu kabari ka Kaawo Godey, nyuma y’aho abaturage babwiriye abashinzwe umutekano ko hari abantu bari guhungabanya umutekano.

Andi makuru avuga ko imirwano yadutse nyuma y’aho abapolisi bafatiye abasirikare babiri bari kumwe na Gen. Sheegow bigateza intambara.

Mu bantu bapfuye nk’uko bitangazwa na polisi, harimo ushinzwe umutekano n’abasirikare ba Sheegow 2 mu gihe hakomeretse abantu icyenda.

Igipolisi cyashinje Gen. Sheegow Ahmed Ali, guhungabanya umutekano mu murwa mukuru no kurwanya inzego zishinzwe umutekano. Umuvugizi w’Igipolisi, Sadik Ali, avuga ko hari telephone zibwe n’amafaranga y’inoti y’amakorano byasanzwe mu rugo rw’uyu musirikare ubwo hasakwaga.