Urufaya rw’amasasu n’urusaku rw’indege z’intambara byashenye gahunda y’agahenge mu murwa mukuru Khartoum wa Sudan, kari kitezwe gutangira saa kumi n’ebyiri z’umugoroba (18:00) ku isaha yaho ku wa kabiri.
Imirwano yatangajwe mu nkengero z’icyicaro gikuru cy’igisirikare cya Sudan kiri hafi y’ikibuga cy’indege cyo muri uwo mujyi, gikikijwe n’uduce dutuwemo n’abantu.
Abajenerali babiri bahanganye muri iyi mirwano bari bemeye agahenge k’amasaha 24 kugira ngo hakorwe ibikorwa by’ubutabazi.
Abantu hafi 200 (...)

Sponsored Ad

Urufaya rw’amasasu n’urusaku rw’indege z’intambara byashenye gahunda y’agahenge mu murwa mukuru Khartoum wa Sudan, kari kitezwe gutangira saa kumi n’ebyiri z’umugoroba (18:00) ku isaha yaho ku wa kabiri.

Imirwano yatangajwe mu nkengero z’icyicaro gikuru cy’igisirikare cya Sudan kiri hafi y’ikibuga cy’indege cyo muri uwo mujyi, gikikijwe n’uduce dutuwemo n’abantu.

Abajenerali babiri bahanganye muri iyi mirwano bari bemeye agahenge k’amasaha 24 kugira ngo hakorwe ibikorwa by’ubutabazi.

Abantu hafi 200 biciwe mu mirwano yatangiye ku wa gatandatu.

Abaturage basigaranye ibiribwa bicyeya n’amazi macyeya, mu gihe imirwano ishyamiranyije igisirikare cya Sudan n’umutwe witwara gisirikare witwa Rapid Support Forces (RSF) ikomeje.

Ku wa kabiri, umuvugizi w’umunyamabanga mukuru w’umuryango w’abibumbye António Guterres yagize ati:

"Imirwano muri Sudan, harimo no muri Khartoum no mu bindi bice bitandukanye, irakomeje. Nta kimenyetso [gihari] cy’igabanuka rya nyaryo ry’imirwano".

Mbere yaho kuri uwo munsi, umugore uba i Khartoum yabwiye BBC ko nta yandi mazi yo kunywa asigaranye mu nzu ye.

Duaa Tariq yavuze ko yari asigaranye icupa rimwe gusa ry’amazi, yari arimo kuzigamira umwana we w’imyaka ibiri, mu gihe abo mu muryango we bari birunze mu "kirongozi gito cyane cy’inzu" mu kwirinda kugerwaho n’urufaya rw’amasasu.

Tariq yagize ati: "Benshi mu bantu bapfuye, bapfira mu nzu zabo kubera amasasu n’ibisasu bya misile byabaguyeho gutyo gusa, rero ni byiza kwirinda kujya ahantu harangaye mu nzu" nko ku madirishya.

Kuri Kaminuza ya Khartoum, umunyeshuri w’umugabo yishwe nyuma yo gukubitwa n’isasu ryayobye.

Mosaab Sharif, umunyeshuri wiga amategeko kuri iyo Kaminuza, wari wikinze mu nyubako iri hafi ya Kaminuza, yabwiye BBC ati: "Twari tugiye gushakira ibiryo abandi banyeshuri".

Ubutumwa bwo kuri Facebook, bwagenzuwe na BBC, buvuga ko umurambo we washyinguwe kuri Kaminuza nyuma yuko bibonetse ko utari kuhakurwa mu mutekano.

Sharif yongeyeho ati: "Twari batatu, nuko araswa mu gatuza. Ntitwashoboye no kumufasha. Mu gihe twari turimo gushyingura mugenzi wacu, umwe muri twe yakubiswe n’isasu mu kiganza cye".

Yavuze ko "ba mudahusha barimo kwibasira buri muntu wese ufite urumuri".

Iminota 30 mbere yuko agahenge kari kitezwe gutangira, abatuye i Khartoum bumijwe no kumva ko abana batatu - abahungu b’abavandimwe babaga mu burasirazuba bw’uwo mujyi - bishwe n’igisasu barashweho.

Abahatuye basoje kwiyiriza kwabo kwo kuri uwo munsi kwo mu gisibo cy’abayisilamu cya Ramadan nyuma gato ya saa kumi n’ebyiri z’umugoroba ku isaha yaho, bahita bumva urusaku rw’amasasu.

Ababibonye i Bahri, mu majyaruguru y’uwo mujyi, bavuze ko indege z’intambara zari zirimo kugendera hejuru y’imitwe yabo.

Undi mugore w’i Khartoum yabwiye BBC ko ibisasu by’imbunda za rutura byakomeje kumvikana nyuma cyane y’igihe agahenge kari kitezwe gutangirira.

Yavuze ko mbere yaho kuri uwo munsi yari yahunganye n’umwana we w’umwaka umwe bava mu rugo rwabo ubwo rwari rurimo kuraswaho ibisasu bya misile.

Nubwo imirwano yaba ihagaze mu masaha 24 ari imbere, ntibishoboka ko haba hari igihe gihagije cyo kugira ngo abasivile bashobore gusaba ubufasha, umuryango utabara imbabare wa Croix-Rouge wavuze ko urwego rw’ubuvuzi rw’iki gihugu ruri hafi gusenyuka.

Croix-Rouge yavuze ko imaze igihe ihamagarwa n’abantu benshi basaba ubufasha baheze mu ngo zabo i Khartoum, umujyi bigereranywa ko utuwe n’abaturage miliyoni 10, benshi muri bo bakaba barimo kugorwa n’imibereho nta muriro w’amashanyarazi bafite.

Imirwano iri no kubera ahandi muri Sudan, harimo no mu karere ka Darfur mu burengerazuba bw’igihugu.

Martin Griffiths, umukuru w’ibikorwa by’imfashanyo by’umuryango w’abibumbye (ONU/UN), yaburiye ko amakuru avuga ko abakozi batanga imfashanyo barimo kugabwaho ibitero ndetse bagakorerwa ihohoterwa rishingiye ku gitsina.

Nyuma y’igihe agahenge kari kitezwe ko kari kuba kamaze gushyirwa mu bikorwa, Griffiths yanditse kuri Twitter ko "ibi ntibyakwihanganirwa kandi bigomba guhagarara".

Imirwano ishyamiranyije imitwe yo mu gisirikare cya Sudan ishyigikiye umutegetsi wa Sudan wo muri iki gihe, Jenerali Abdel Fattah al-Burhan, n’umutwe witwara gisirikare uzwi cyane, RSF, utegekwa n’umutegetsi wungirije wa Sudan, Jenerali Mohamed Hamdan Dagalo, uzwi cyane nka Hemedti.

BBC