Amakuru macye akomeje gutangazwa ku karubanda ku ntambwe y’ibiganiro bibera i Jeddah muri Arabie Saoudite, hagati y’igisirikare cya Sudan n’umutwe barwana witwara gisirikare witwa Rapid Support Forces (RSF).

Sponsored Ad

Ni ibiganiro birimo kuba ku buhuza bwa Arabie Saoudite (Saudi Arabia) n’Amerika, byatangiye ku itariki ya 6 Gicurasi (5).

Umukuru w’igisirikare cya Sudan Jenerali Abdel Fattah al-Burhan – umutegetsi wa Sudan muri iki gihe – n’umukuru wa RSF Jenerali Mohamed Hamdan Dagalo, uzwi cyane nka Hemedti, ni bo barimo guhatanira ubutegetsi.

Ariko Jenerali Burhan ku wa mbere yabwiye televiziyo Al-Qahera News TV yo mu Misiri ko "nta cyo bimaze kwicara ku meza y’ibiganiro muri Saudi Arabia" mu gihe nta gahenge nyako gahari.

Jenerali Burhan yavuze ko yakiriye neza gahunda zose zigamije gutuma amaraso areka gukomeza kumeneka mu gihugu, ariko ashimangira ko umutwe wa RSF ugomba gushyira intwaro hasi.

Mbere yaho, umudiplomate wa Arabie Saoudite yabwiye ibiro ntaramakuru AFP ko ibiganiro nta "musaruro ufatika" byatanze.

Amasezerano y’agahenge menshi yagiye arengwaho kuva iyi mirwano yakwaduka ku itariki ya 15 Mata (4) uyu mwaka.

Ihirikwa ry’ubutegetsi ryakozwe n’igisirikare ryo mu 2021 ryasoje igihe cy’imyaka irenga ibiri abasirikare n’abasivile bari bamaze basangiye ubutegetsi.

Ayo masezerano yo gusangira ubutegetsi yagezweho nyuma yuko uwari Perezida w’umunyagitugu Omar al-Bashir, wari umaze imyaka igera kuri 30 ku butegetsi, ahiritswe n’igisirikare nyuma y’imyigaragambyo ya rubanda.