Urukiko Rukuru muri Uganda ruri mu murwa mukuru Kampala, rwakatiye umugabo w’imyaka 25 wishe abantu benshi, gufungwa imyaka 105.

Musa Musasizi yakatiwe icyo gifungo kuri uyu wa gatatu, nyuma yo kwemera ko yishe abagore batatu bivugwa ko bari abakunzi be, n’uruhinja rw’umukobwa rw’amezi atatu rw’umwe mu bo yishe.

Urukiko rwumvise ko amakuru avuga ko yagiranaga umubano w’urukundo n’abo bagore, nyuma akabasambanya ku ngufu akanabica, ubundi agatwika imirambo yabo akayijugunya.

Umucamanza, Justice Margaret Mutonyi, yavuze ko icyo gifungo kirekire ari ngombwa mu rwego rwo kurinda abagore bakiri bato, barimo n’umwana w’umukobwa w’imyaka itandatu wa Musasizi, nkuko byatangajwe na televiziyo NTV itari iya leta.

Musasizi yari yatawe muri yombi muri Werurwe (3) mu 2021 acyekwaho kwica abagore batanu n’uruhinja.

Muri Nyakanga (7) uyu mwaka, yahamwe no kwica umwe muri abo bagore.

Icyo gihe, umwunganizi we mu mategeko yasabye umucamanza imbabazi, avuga ko Musasizi, wahoze ari umwana wo mu muhanda, yarokotse uburere bugoye.

BBC