skol

Uganda yikomye u Rwanda kubera wa musirikare wafatiwe ku butaka bwarwo

Amakuru   Yanditswe na: Dusingizimana Remy 16 June 2021

Nyuma yuko u Rwanda rushubije Uganda umusirikare w’icyo gihugu rwemeza ko yafatiwe ku butaka bwarwo, ministeri y’ububanyi n’amahanga ya Uganda iravuga ko ifite ibimenyetso ko uwo musilikaRi yashimutiwe ku butaka bwayo.


Umunyamabanga uhoraho muri ministeri ishinzwe ububanyi n’amahanga muri Uganda, Ambasaderi Patrick Mugoye yabwiye Ijwi ry’Amerika ko boherereje u Rwanda urwandiko rugaya icyo gikorwa yise "ubushotoranyi bw’icyo gihugu cy’igituranyi".

Itangazo ryasohowe n’igisirikare cy’u Rwanda mbere yuko basubiza uwo musirikare muri Uganda, ryavuze ko yafatiwe kU butaka bw’u Rwanda. Igisirikare cy’u Rwanda cyashyikirije uwo musirikare inzego za Uganda ku mugoroba wo ku Cyumweru hashize hafi amasaha 28 Uganda idafite amakuru y’aho aherereye.

Mbere yuko agarurwa, ingabo z’u Rwanda zari zavuze ko uyu Bukuru Muhuba yafashwe n’ingabo zagenzuraga umupaka zimufatiye ku butaka bw’u Rwanda mu karere ka Burera mu majyaruguru y’icyo gihugu hafi n’umupaka wa Uganda.

Ariko Uganda ivuga ko ifite ibimenyetso bishingiye ku ikoranabuhanga byerekana ko uwo musirikare atari yakambutse mu Rwanda, ahubwo ko yaguye mu mutego w’abasirikare b’u Rwanda bari bateze ku butaka bwa Uganda.

Ifatwa ry’uwo musirikare risa nkaho ryari rigiye kubyutsa ubushyamirane hagati y’ibihugu byombi.

umubano hagati y’ibi bihugu byombi ntabwo ari mwiza kuva aho u Rwanda rufatiye umwanzuro wo gufunga imipaka rusangiye na Uganda; ubutegetsi bukanatangaza icyo bwise "kugira inama" Abanyarwanda kudakorera ingendo muri Uganda.

U Rwanda rushinja Uganda gushyigikira abanzi barwo, Uganda na yo igashinja u Rwanda kohereza intasi zigamije guhungabanya umutekano muri Uganda.

Buri kimwe muri ibi bihugu cyakomeje guhakana ibirego bya kigenzi cyacyo.

Ntabwo ari ubwa mbere Uganda yandikira u Rwanda yinubira ibindi bikorwa bifitanye isano n’ishimutwa ry’abaturage bayo.

Iheruka na none kubikora ubwo hari abaturage ba Uganda barashwe bazizwa kwambutsa ibicuruzwa ku buryo bwa magendo no gushaka kurwanya inzego z’umutekano z’icyo gihugu.

Ibiganiro byo gukemura amatati hagati y’ibihugu byombi byari biyobowe na perezida wa Angola n’uwa Republika ya Demokarasi ya Kongo ntacyo byagezeho.

Amakuru avuga ko uyu musirikare yafashwe yarenze imbibi z’igihugu cye kuko yafatiwe mu Mudugudu wa Majyambere mu Kagari ka Kamanyana, mu Murenge wa Cyanika ho mu Karere ka Burera.

Yafashwe yambaye imyenda y’Igisirikare cya Uganda, afite imbunda yo mu bwoko bwa Medium Machine Gun (MMG), amasasu 100, indebakure imwe, telefoni imwe n’ibyangombwa bya gisirikare.

Nyuma yo gusubizwa igisirikare cya Uganda, Private Bakuru Muhuba yavuze ko yatunguwe n’uburyo yakiriwe neza mu Rwanda kugeza ubwo asubijwe iwabo.

Yagize ati “Nari mu kazi kacu ka gisirikare ni bwo narenze iwacu nisanga ku butaka bw’u Rwanda, umusirikare waho arampamagara anyereka ko narenze iwacu, baramfashe banyakiye neza ubu nta kibazo na kimwe mfite. Baranganirije, nishimiye uburyo mu Rwanda nakiriwe ku buryo ntabitekereza, mbese nta kibazo navuga ubu mfite kandi nishimiye kongera gusubira mu gihugu cyanjye.’’

Uyu musirikare wa Uganda yatanzwe n’igisirikare cy’u Rwanda, RDF binyujijwe mu Biro bishinzwe Abinjira n’Abasohoka mu Rwanda ku Mupaka wa Cyanika. Impande zombi zashyize umukono ku nyandiko yerekana ko iryo hererekanya ryabayeho.

Igitangaje nuko n’intumwa ya Perezida wa Uganda mu Karere ka Kisoro wari ukuriye itsinda rya Uganda ryakiriye uwo musirikare, Captain Mugisha Peter, yashimye u Rwanda uko rwitwaye muri iki kibazo no kuba uwafashwe ubwe yivugira ko yakiriwe neza hanyuma bakaba bageze ubwo bashinja u Rwanda kumushimuta.

Ijwi ry’Amerika

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

RDC:Minisitiri yatumijwe n’abadepite ngo asobanure uko ingabo z’u Rwanda...

Inteko ishingamategeko ya Repubulika ya Demokarasi ya Congo yatumije...
21 October 2021 0

Burundi: Mu minsi 3 gusa habonetse imirambo 14 muri Komini 2...

Hagati ya tariki ya 14 na 17 Ukwakira honyine, byibuze imirambo 14...
20 October 2021 0

Leta ya Nijeriya yigambye ibitero byahitanye inyeshamba 24

Igisirikare cya Nijeriya kiravuga ko kiciye inyeshyamba za kiyisilamu 24 mu...
19 October 2021 0

Uganda yamuritse igifaru cy’intambara yikoreye [AMAFOTO]

Umugaba w’ingabo zirwanira ku butaka za Uganda Liyetona Jenerali Muhoozi...
19 October 2021 0

Koreya ya ruguru yarashe misile ballistic igwa mu mazi yo hafi...

Koreya ya ruguru yarashe igisasu cya misile yo mu bwoko bwa ballistic...
19 October 2021 0

RDC: Abanyamulenge barenga 1500 Bageze mu mujyi wa Baraka bahunga Mai...

Abaturage babarirwa mu bihumbi bo mu bwoko bw’Abanyamulenge bahunga ibitero...
16 October 2021 1