skol
Fortebet

Umugore w’Umunya-Nigeria wishwe n’Umutaliyani arasaba ubutabera

Amakuru   Yanditswe na: Dusingizimana Remy 2 August 2022

Umugore w’umucuruzi ukomoka muri Nigeria wacururizaga mu muhanda wiciwe mu Butaliyani yabwiye BBC ko arimo gushaka ubutabera nyuma y’"urupfu rubabaje" rwe.

Aliku Ogorchukwu, wari ufite imyaka 39, amakuru avuga ko ku wa gatanu yari arimo acuruza ibitambaro by’isuku yo mu zuru (mouchoirs) mu mujyi ukora ku nyanja wa Civitanova Marche, ubwo yirukankanwaga agakubitwa kugeza apfuye.

Umutaliyani w’umugabo w’imyaka 32 yatawe muri yombi acyekwaho ubwicanyi n’ubujura.

Videwo yo ku mbuga nkoranyambaga igaragaza umugabo ari hejuru ya Ogorchukwu, amukubita ingumi akoresheje ibiganza birimo ubusa.

Nta muntu n’umwe mu babonye icyo gitero kirimo kuba ku manywa y’ihangu wagaragaye atabara.

Charity Oriachi, umugore wa Ogorchukwu, yabwiye ikiganiro Focus on Africa cya BBC cyo kuri radio ati: "Ibi ni ubwoko bw’ubunyamaswa ntazi".

Oriachi yavuze ko yabonye ubufasha bwo gutuma yakira iby’urupfu rw’umugabo we ariko ko arambiwe "amagambo". Yashimangiye ko ubu ikimushishikaje gusa ari ubutabera.

Yavuze ko umuryango we wari umaze igihe kirekire uba mu Butaliyani, avuga ko umugabo we nta na rimwe yari yarigeze agira uwo asagarira.

Iyicwa rye ryateje uburakari bwinshi mu bahatuye, barimo n’Abanya-Nigeria, biraye mu mihanda mu mpera y’icyumweru gishize, bakaba barimo no guteganya gukora indi myigaragambyo vuba aha.

Leta ya Nigeria yasabye abategetsi b’Ubutaliyani kugeza mu butabera byihuse "uwakoze iki gikorwa cy’ubugome ndengakamere".

Ucyekwa ntiyarekuwe

Ucyekwa - umuzungu w’umugabo watangajwe ko yitwa Filippo Claudio Giuseppe Ferlazzo - yategetswe kuguma muri gereza mu gihe iperereza rikomeje.

Umwunganizi we mu mategeko yabwiye ibitangazamakuru ko uyu ucyekwa yavuze ko ababajwe kandi asaba imbabazi kubera ibyabaye, ndetse ko "nta kintu cy’ivanguramoko" cyari kibirimo.

Umupolisi ukora iperereza yavuze ko Ogorchukwu yagabweho igitero nyuma yuko uyu mucuruzi "atitirije" asaba uwo ucyekwa hamwe n’umukunzi we amafaranga macyeya basaguye.

Umukunzi w’ucyekwa, watangajwe ko yitwa Elena D, yabwiye ikinyamakuru Corriere della Sera cyo mu Butaliyani ko Ogorchukwu yari yamukoze ku kuboko, ariko ko ibyo nta cyo byaribimutwaye.

Ubu Oriachi arasaba kubona "amaso ku maso" uwo ucyekwa, kugira ngo asobanukirwe impamvu yamwiciye umugabo, nkuko umunyamategeko w’uyu muryango yabibwiye ibiro ntaramakuru Associated Press.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Nepal: Ingwe zari zigiye gucika bakazibungabunga zimereye nabi...

Nepal yakoze ibikomeye ikuba akarenze kabiri umubare w’ingwe mu myaka 10...
8 August 2022 0

Abimukira Barenga 250 barusimbutse mu Nyanja ya Mediterane

Abasirikare ba Tuniziya Batabaye Abimukira Barenga 250 muri Mediterane...
8 August 2022 0

US yamaganye Ubushinwa bwakoze imyitozo yo gutera Taiwan

Leta Zunze Ubumwe za Amerika zirashinja Pékin/Beijing ko iri gukora ibikorwa...
7 August 2022 0

Umukecuru yagiye gutabara umugabo we wari ugiye kurohama barapfana

Umukecuru yarohamye mu mazi ubwo yagerageza gutabara umugabo we nyuma yo...
6 August 2022 0

Imbaga y’abanye Goma yitabiriye gushyingura abaguye mu myigaragambyo

Abarenga 5000 nibo bitabiriye umuhango wo gushyingura bagenzi babo biciwe...
5 August 2022 0

DR Congo: Haravugwa imirwano y’Imbonerakure na Red-Tabara

Abarwanyi b’Imbonerakure kuwa gatatu bigaruriye agace ka Birimba nyuma...
5 August 2022 0