Umuyobozi w’Ingabo zidasanzwe z’Umutwe wa FDLR, Colonel Ruhinda Gaby ubusanzwe witwa Protogène Ruvugayimikore, yishwe aturikijwe n’igisasu cyatezwe mu buriri bwe.

Uyu Ruhinda yishwe mu gihe imirwano hagati y’Ingabo za Congo (FARDC) ndetse n’umutwe wa M23 yakomeje kuri iki Cyumweru.

Col Ruvugayimikore Protogène wa FDLR-FOCA, yari azwi ku mazina menshi nka Ruhinda, Gaby Ruhinda, Zorro Midende.

Gen.Omega na Lt.Col Guillaume barashyirwa mu majwi ko aribo baba bari inyuma y’urupfu rwa Nyakwigendera Ruvugayimikore Protogene (Ruhinda) wari Komanda wa CRAP, umutwe ushinzwe ibikorwa bya gisilikare bidasanzwe muri FDLR.

Ikinyamakuru Rwandatribune dukesha iyi nkuru kivuga ko uwagihaye amakuru yakibwiye ko ejo ku gicamunsi ariho abari hafi y’ibirindiro bikuru bya Col.Ruhinda bumvise urusaku ruremereye rw’igisasu .

Amakuru avuga ko abasirikare ba FDLR CRAP ngo baje kunyuza umuntu w’inkomere waviriranaga amaraso menshi mu gace k’Umwembe wa Muja muri Gurupoma ya Bukumu,Tiritwari ya Nyiragongo aho uwo muntu yahise ajyanywa mu bitaro bya CBK i Goma.

Uwo muntu byaje kumenyekana ko ari Col.Ruvugayimikore (Ruhinda) waturikanywe n’igisasu cyari cyatezwe mu buriri aryamamo ,umwe mu baganga bakorera mu bitaro bya CBK i Goma yahamirije Rwandatribune urupfu rwa Col.Ruhinda.

Uyu Muganga utakunze ko amazina ye atangazwa avuga ko yazanywe ari intere mu bitaro bya CBK Goma,akaba yaje gushiramo umwuka mu masaha ya saa yine z’ijoro .

Aya makuru kandi akaba yahamijwe n’umwe mu muryango we uri I Goma waganiriye n’iki kinyamakuru.

Umwe mu bakurikirana ibya politiki bavuga urupfu rwa Col.Ruhinda rubaye arirwo rwaba ari incamugongo ku mutwe wa FDLR cyane ko ariwe murwanyi ukomeye uyu mutwe wa FDLR wagenderagaho.

Abasesenguzi kandi bavuga ko hari hashize iminsi myinshi hari umwuka mubi hagati ya Gen.Omega na Col.Ruhinda,aho Gen.Omega yashinjaga Col.Ruhinda kuba ahora ategura ibikorwa byo kumuhirika .

Umutwe wa FDLR ntacyo uravuga ku rupfu rwa Col.Ruhinda.