Umutwe wa M23 urigamba gukwiza imishwaro ihuriro ry’ingabo za Leta ya Repubulika Iharanira Demokarasi ya Congo, nyuma y’imirwano yanagaragayemo indege z’intambara yaraye isakiranyije impande zombi.

Ni imirwano yabereye muri Teritwari ya Lubero kuva mu gitondo cyo ku Cyumweru tariki ya 22 Ukuboza 2024.

Amashusho yakwirakwiye ku mbuga nkoranyambaga yerekana indege ya Sukhoi-25 y’igisirikare cya RDC na za kajugujugu zirasa ku birindiro by’umutwe wa M23 mu duce nka Kitsombiro, Ndoluma na Mambasa.

Ni amashusho yiganjemo ayafashwe n’abasirikare ba Congo bumvikana bahaye induru umunwa, kubera akanyamuneza baterwaga n’ibisasu indege zarimo zisuka ku birindiro by’inyeshyamba.

Icyakora M23 ivuga ko ibitero by’indege nta ngaruka byigeze biyigiraho, ko ahubwo nyuma y’imirwano ikomeye “umwanzi” yahise akwira imishwaro.

Lt Col Willy Ngoma uvugira igisirikare cy’uyu mutwe mu butumwa yanditse ku rubuga rwe rwa X, yemeje aya makuru agira ati: “Guverinoma ya Congo yazanye za kajugujugu, indege z’intambara ndetse n’imbunda z’imizinga mu bice bya Lubero; hanyuma itangira kurasa buhumyi mu basivile.”

“Nyuma y’imirwano ikaze, umwanzi yakwiye imishwaro. Imirwano 100 ingana intsinzi 100. Intare ziryamiye amajanja.”

M23 iravuga ko yakubise FARDC ahababaza, mu gihe uruhande rw’Ingabo za Congo ruvuga ko rwaraye rwisubije agace ka Mambasa, ndetse ko FARDC n’abayifasha bari gukoza imitwe y’intoki ku kandi gace ka Alimbongo M23 yaherukaga kubirukanamo.