Nyuma yo guhigwa bukware na polisi, Robert Card wacyekwagaho kwica abantu 18 abarashe muri Leta ya Maine muri Amerika, yasanzwe yapfuye, aho bivugwa ko yirashe.

Robert Card yabonetse yapfuye nyuma y’amasaha 48 ashinjwe kwica abantu 18 abandi 13 bakomereka ahitwa Maine.

Card w’imyaka 40, yari amaze iminsi irenga ibiri ahunga nyuma y’ubwo bwicanyi buteye ubwoba bwabereye mu kabari n’ahakinirwa bowling i Lewiston.

Umurambo wa Card wabonetse ku isaha ya saa moya na 45 z’umugoroba ku wa gatanu mu kimoteri cyo ku ruganda rwa Lisbon Falls aho yakoraga mbere yo kwirukanwa nk’uko bitangazwa na WMTW.

Uyu ukekwaho ubwicanyi biravugwa ko yaba yarirashe mu mutwe, nubwo kugeza ubu bitaramenyekana neza igihe yapfiriye.

Yari yambaye imyenda isa niyo yari yambaye ubwo yafotorwaga ari aho bakiniraga umukino wa bowling yitwaje imbunda yo mu bwoko bwa AR-15.

Abapolisi bari babonye imodoka ya Card mu gace ka Lisbonne mu ijoro ryo ku wa gatatu, nyuma gato y’uku kurasa.

Kuboneka k’umurambo we kwarangije amasaha 48 y’iterabwoba muri Lewiston no mu mijyi ihakikije,yari iryamiye amajanja kubera ko Card yari yabuze afite imbunda.

Card yabonetse yapfuye nyuma y’amasaha make abapolisi bashyize ahagaragara amazina n’amafoto y’abantu 18 bose bishwe.

Umuto mu bishwe yari afite imyaka 14 gusa.