Uwahoze ari umutegetsi w’Uburusiya uzwi cayne mu gihugu, akaba yarahoze ayoboye igice kijyanye n’iby’ikirere, akaba yaranabaye icyegera cya Minisitiri w’Intebe,aravuga ko yakomerekeye mu gitero cya Ukraine kuri hoteri.
Dmitry Rogozin avuga ko yakomeretse mu mugongo hafi y’ibitugu mu mujyi wa Donetsk mu karere kagenzurwa n’Uburusiya mu burasirazuba bwa Ukraine.
Uwashyizweho n’Uburusiya ngo ayobore intara ya Donetsk na we yakomeretse mu gihe hari undi mugabo na we bivugwa ko yishwe.
Mu (…)

Uwahoze ari umutegetsi w’Uburusiya uzwi cayne mu gihugu, akaba yarahoze ayoboye igice kijyanye n’iby’ikirere, akaba yaranabaye icyegera cya Minisitiri w’Intebe,aravuga ko yakomerekeye mu gitero cya Ukraine kuri hoteri.

Dmitry Rogozin avuga ko yakomeretse mu mugongo hafi y’ibitugu mu mujyi wa Donetsk mu karere kagenzurwa n’Uburusiya mu burasirazuba bwa Ukraine.

Uwashyizweho n’Uburusiya ngo ayobore intara ya Donetsk na we yakomeretse mu gihe hari undi mugabo na we bivugwa ko yishwe.

Mu bibera ahandi, mu majyepfo ya Ukraine, abategetsi bashyizweho n’Uburusiya bavuga ko ikibombe cyari cyatezwe mu modoka cyaturitse kigahitana umutegetsi w’akarere.

Ingabo za Ukraine ni zo zishinjwa icyo gitero kuri Andrei Shtepa mu burasirazuba bwo hagati bw’uruzi Dnipro mu ntara ya Kherson.

Uburusiya bwavuye ku ruhande rw’uburengerazuba bw’urwo ruzi mu Ugushyingo, ariko bukomeza kugenzura akarere kose gasigaye ko muri iyo ntara yo mu majyepfo.

Kherson ni imwe mu ntara 4 za Ukraine Vladimir Putin aherutse gutangaza ko zegukanwe n’Uburusiya, nubwo yananiwe no kwigarurira intara n’imwe yose.

Dmitry Rogozin avuga ko yakomeretse ku mugoroba wo ku wa gatatu biturutse ku muntu wamenye ibanga ko we n’abandi barimo gusangirira hamwe kuri hoteri Shesh-Besh iri ku nkengero ya Donetsk ujya mu majyepfo.

Umukozi yabwiye ibinyamakuru by’Uburusiya ko iyo hoteri yatewe igisasu, gishobora kuba cyararashwe n’imbunda yo mu bwoko bwa howitzer yakozwe n’Ubufaransa.

Ejo ku wa kane, yanditse kuri Twitter ati: "Wari umubonano w’akazi n’incuti za hafi. Twari tumaze aya mezi yose muri iyi hoteri, kandi mu myaka umunani yose, umwanzi ntiyari bwigere ateraiki gice”.

Hanyuma yavuze ko hari agapande k’icyuma kamugumyemo.

Ati: "Ni ngombwa ko mbagwa. Abantu batari bake b’incuti zanjye na bo
bakomeretse”.

Rogozin arazwi cyane mu magambo yuzuye urwango ku bihugu byo mu Burengerazuba, kandi azwi ko ashyigikiye cyane igitero cy’Uburusiya kuri Ukraine.

Ku wa gatatu, nibwo yujuje imyaka 59, ariko akaba ahakana amakuru avuga ko yari mu kirori cy’isabukuru ye icyo gihe.

BBC