kuri uyu wa 08 mata 2025 abayobozi n’abakora mu ruganda rwenga ibinyobwa bisembuye n’ibidasembuye SKOL Brewery Ltd bibutse ku nshuro ya 31 Jenoside yakorewe abatutsi mu 1994 akaba ari igikorwa bakoreye ku Rwibutso rwa Nyanza ruherereye mu karere ka Kicukiro.

Sponsored Ad

Mu gihe u Rwanda n’isi muri rusange bari mu cyumweru cyo kwibuka Jenoside yakorewe abatutsi mu 1994, abayobozi n’abakora mu ruganda rwa SKOL Brewery Ltd nabo bifatanyije n’abanyarwanda kwibuka mu gikorwa bakoreye ku Rwibutso rwa Nyanza ya Kicukiro. Ni umuhango wabanjirijwe no gushyira indabo ahashyinguye imibiri y’abatutsi bishwe muri Jenoside ndetse banasobanurirwa amwe mu mateka y’ibyabereye ahari uru rwibutso mu gihe cya Jenoside yakorewe abatutsi mu 1994.

Gasigwa Gilbert ushinzwe gusobanura amateka yo ku Rwibutso rwa Nyanza ya Kicukiro yabasobanuriye muri make amwe mu mateka y’abatutsi bashyinguye muri urwo Rwibutso aho yababwiye ko uru rwibutso rushyinguyemo abatutsi basaga ibihumbi ijana na bitanu magana atandatu[105,600] muribo hakaba harimo abarenga ibihumbi bitatu [3000] bahiciwe naho abandi akaba ari imibiri yahazanwe kugirango ishyingurwe mu cyubahiro.

Uwashinze SKOL Brewery Ltd Thibault Relecom, yavuze ko bibuka bakanazirikana ibihe bikomeye n’agahinda abarokotse Jenoside banyuzemo mu gihe cya Jenoside yakorewe abatutsi muri 1994 ariko kandi ko bikwiye kubera buri wese isomo ryo kurwanya icyatera nanone Jenoside.

Yagize ati "Turibuka kandi tuzirikana urugendo rutoroshye ndetse n’ibihe bikomeye abavandimwe bacu bahigwagwa mu gihe cya Jenoside yakorewe abatutsi mu 1994 banyuzemo, mu by’ukuri tugomba kubaha ahahise ariko kandi nanone ntitukibagirwe ko hari icyizere cyo kubaho ndetse tukanarebera ku ntambwe u Rwanda rumaze gutera ndetse n’abanyarwanda muri rusange".

Thibault yasoje ashimira abakozi ba SKOL Brewery Ltd bateguye iki gikorwa cyo kwibuka ndetse abasaba no gufata umunota wo kwibuka abazize Jenoside yakorewe abatutsi mu 1994.