Kuri uyu wa 10 Nyakanga 2026, Abayobozi n’abakozi ba WIH Rwanda Cement Co. Ltd, ikora sima ya CHEETAH, basuye Urwibutso rwa Jenoside rwa Kigali ruherereye ku Gisozi mu rwego rwo kwiga amateka y’u Rwanda no kurushaho gusobanukirwa Jenoside yakorewe Abatutsi mu 1994.

Iki gikorwa cyitabiriwe n’abakozi b’ingeri zitandukanye barimo Abanyarwanda n’abanyamahanga bakorera iyi kompanyi, hagamijwe kubafasha kumenya amateka nyayo y’u Rwanda no gusobanukirwa indangagaciro zaranze urugendo rwo kwiyubaka no kubaka ubumwe n’ubwiyunge mu Rwanda.

WIH Rwanda Cement Co. Ltd yatangiye ibikorwa byayo mu Rwanda mu mwaka wa 2023, ikaba imaze hafi imyaka itatu ikorera mu gihugu. Uretse intego yo gutanga sima yujuje ubuziranenge no gushyigikira iterambere ry’ibikorwa remezo, iyi kompanyi ivuga ko ishyira imbere no gufasha abakozi bayo gusobanukirwa amateka n’indangagaciro by’u Rwanda.

Mussa Mutsinzi, umuyobozi mukuru ushinzwe Abakozi n’ubucuruzi, yavuze ko bifuje kera gukora igikorwa cyo gusura urwibutso rwa Jenoside yakorewe abatutsi mu 1994, anavuga ko intego nyamukuru y’iyi gahunda ari ugukomeza kwigira ku mateka no kubaka ahazaza heza h’u Rwanda.

Yagize ati: "Kuva twatangira gukora, twahoze twifuza gutegura urugendo nk’uru nguru cyane cyane ko iki kigo ari ishoramari ry’abanyamahanga, kikaba n’ikigo gikoreramo Abanyarwanda, Abarundi, Abanyekongo, Abanyatanzaniya, Abanyakenya ndetse n’abashinwa. Ni igikorwa mu by’ukuri cy’ingirakamaro cyane cyane aho dusubiza amaso inyuma tukareba ku mateka y’igihugu cyacu. Amateka y’igihugu cyacu rero, niyo abumbatiye iri terambere tubona uyu munsi. Kuko twizemo amasomo menshi. Niyo mpamvu tuba dushaka ko abanyamahanga baza gukorera mu gihugu cyacu bamenya ikidutera imbaraga zo gukora cyane nk’abanyarwanda."

Mutsinzi yakomeje agira ati: "Intego nyamukuru y’uru rugendo, kwari ukugirango dukomeze twigire ku mateka, duhanga ahazaza hacu nk’u Rwanda ndetse n’abandi bafatanyabikorwa u Rwanda rugira. Ikindi tuba tugirango duhozeho kwigisha yaba abanyarwanda ndetse n’abanyamahanga baba mu gihugu cyacu, barusheho kumenya no gusonukirwa amateka yacu, kuko akenshi ibihugu baturukamo bagenda bazana amakuru atandukanye rimwe na rimwe usanga adahuye n’ukuri nyirizina kw’amateka yabaye mu gihugu cyacu. Niyo mpamvu rero dutera intambwe nkiyi ngiyi kugirango tubasobanurire, bamenye, banahigerere, ibyo bumva babiboneshe amaso yabo kugirango barusheho gutera ingabo mu bitugu igihugu cyacu ndetse n’abanyarwanda mu iterambere twiyemeje kugeraho."

Tang Shenghui, Umuyobozi mukuru wa WIH Rwanda Cement Co.Ltd yavuze ko nyuma yo gusura urwibutso rwa Jenoside yakorewe abatutsi 1994, babashije gusobanukirwa neza amateka y’u Rwanda; ndetse asaba abanyarwanda gukura amasomo kuri aya mateka, akababera impamvu yo kubaka ejo hazaza heza kandi bakarushaho kwimakaza ubumwe n’ubwiyunge n’iterambere, bakabigeraho bafatanyije kandi bashyize hamwe.

WIH Rwanda Cement Co.Ltd yatangiye gukorera mu Rwanda mu kwezi kwa Kanama 2023, ikaba ikorera mu cyanya cy’inganda giherereye mu karere ka Muhanga, mu ntara y’amajyepfo.