Ikigo cy’Igihugu cy’Ibarurishamibare (NISR) cyagaragaje ko abantu batunze kandi bakoresha telefone mu Rwanda barenze miliyoni 12, mu gihe abakoresha internet bo ari miliyoni icyenda.

Ibyo bikubiye muri raporo ngarukamwaka izwi nka Rwanda Statistical Yearbook yasohowe na NISR mu mpera z’Ukuboza 2025.

Iyo raporo igaragaza ko iyo mibare y’abakoresha izo serivisi zombi z’itumanaho mu Rwanda yagiye izamuka mu myaka ine ishize.

Iyo mibare ishingiye ku yakozwe n’Urwego Ngenzuramikorere (RURA) igaragaza ko mu 2020 ikoreshwa rya telefone zigendanwa n’izitagendanwa mu Rwanda ryari riri ku ijanisha rya 83,9%, bigeze mu 2021 bagera kuri 84%.
Mu 2023 ikoreshwa rya telefone mu baturarwanda ryageze kuri 83,14%, ariko mu 2024 ryongera kuzamuka rigera kuri 94,24%.

Mu 2020 sosiyete y’itumanaho ya MTN Rwanda yari ifite abayikoresha mu buryo bwo guhamagara 6.557.073, mu gihe Airtel Rwanda yo yari ifite abangana na 4.057.335.

Mu 2021 iyo mibare yaramanutse ku bakoresha Airtel Rwanda baba 3.948.466, mu gihe MTN babaye 6.954.523. Mu 2022 abakoresha Airtel Rwanda bari 3.913.172, MTN Rwanda ari 7.088.906.

Mu 2023 imibare yarazamutse kuri izo sosiyete zombi, abakoresha MTN Rwanda baba 7.892.546. Kuri Airtel Rwanda bageze kuri 4.870.530.

Imibare ya buri mwaka uyiteranyije usanga Abanyarwanda bakoresha telefone biyongera kuko mu 2020 bose hamwe bari 10.614.408, bigeze mu 2021 bagera kuri 10.902.989.

Bakomeje kwiyongera mu 2022 bagera kuri 11.002.078 ndetse birakomeza mu 2023 bagera kuri 12.763.076.

Mu bijyanye n’abakoresha internet mu Rwanda raporo ya NISR igaragaza ko MTN na Airtel Rwanda ari zo sosiyete zifite abakoresha internet yazo benshi ndetse zigize ijanisha rinini cyane ry’abayikoresha mu Rwanda hose.

Imibare yabo nayo igenda izamuka kuko mu 2019 abakoresha internet ya Airtel bari 3.265.906, mu gihe iya MTN Rwanda yakoreshwaga na 4.127.69.

Mu 2020 iyo mibare yarazamutse, abakoresha internet ya MTN bagera kuri 5.116.543. Abakoresha iya Airtel bo baragabanyutse bagera kuri 2.744.244.

Mu 2021 abakoresha internet ya Airtel mu Rwanda bari 2.909.186, mu gihe abakoresha iya MTN bari 5.311.316 ariko bigeze mu 2022 bagera kuri 5.481.263 mu gihe aba Airtel bari 2.710.289.
Mu 2023 imibare yarazamutse kuri izo sosiyete zombi abakoresha internet ya Airtel bagera kuri 3.436.746 naho aba MTN bagera kuri 5.753.909.

Sosiyete zicuruza internet mu Rwanda si izo ebyiri gusa kuko harimo n’izindi nyinshi kandi na zo abafatabugizi bazo bakomeje kwiyongera harimo nka BSC yagize abayikoresha 20.398 mu 2023 na Liquid Telecom yagize 18.094 muri uwo mwaka.

Mu 2023 kandi abakoresha internet ya Mango Telecom mu Rwanda bageze kuri 61.257, aba GVA Rwanda baba 25.161 mu gihe ba Kopa Telecom bageze kuri 6.817 muri uwo mwaka.

Iyo raporo igaragaza ko izo sosiyete zose n’izindi uteranyije imibare y’abakoresha internet yazo usanga biyongera kuko mu 2019 bose bari 7.469.233 bigeze mu 2020 bagera kuri 7.995.325 naho mu 2021 baba 8.348.781.

Bakomeje kwiyongera kandi kuko mu 2022 bari bageze kuri 8.327.287 mu gihe mu 2023 biyongereyeho abarenga miliyoni bagera kuri 9.339.894.