Umugore w’imyaka 45 wo mu Kagari ka Nyabagendwa, Umurenge wa Rilima, mu Karere ka Bugesera, ari mu maboko y’ubutabera akurikiranyweho icyaha cyo kwica umugabo we amunigishije igitambaro, nyuma y’amakimbirane bivugwa ko yabaye hagati yabo.

Amakuru ari mu dosiye y’Ubushinjacyaha agaragaza ko ibi byabaye mu ijoro ryo ku wa 30 Mata 2026, ahagana saa tatu z’ijoro. Nyuma y’icyo gikorwa, nyakwigendera yasanzwe yapfiriye ku buriri mu rugo rwabo.

Mu iburanisha ryabaye ku wa 9 Nyakanga 2026, uregwa yemeye ko ari we wazirikishije umugabo we igitambaro nyuma y’uko bari bamaze kurwana. Yabwiye urukiko ko atari azi ko icyo yakoze cyari kumuviramo urupfu, asobanura ko nyuma y’amakimbirane yahise ava mu rugo akajya kurara mu baturanyi.

Ubushinjacyaha buvuga ko ibyo uregwa yemeye biri mu bimenyetso biri gusuzumwa n’urukiko mu rwego rwo kumenya neza uko ibyabaye byagenze n’inshingano z’umuntu ukurikiranyweho iki cyaha.

Icyaha cy’ubwicanyi akurikiranyweho giteganywa kandi kigahanishwa ingingo ya 107 y’Itegeko nº 68/2018 ryo ku wa 30 Kanama 2018 riteganya ibyaha n’ibihano muri rusange.

Urubanza rukomeje kuburanishwa, hakazafatwa icyemezo hashingiwe ku bimenyetso no ku mategeko agenga imanza z’inshinjabyaha.