Kuri uyu wa Gatandatu wa Kamena, Madamu Jeannette Kagame yitabiriye ibirori byo guha impamyabumenyi abanyeshuri barangije amasomo yabo muri Green Hills Academy, byabereye muri Kigali Convention Center.

Abanyeshuri 120 basoje amasomo yabo mu mwaka wa 2026 bahawe izina ry’“Indahangarwa”. Abo banyeshuri barangije muri Green Hills Academy, ishuri riherereye i Nyarutarama mu Karere ka Gasabo.

Ibi birori byitabiriwe n’abarangije amasomo, abanyeshuri bato bakiri mu byiciro bitandukanye by’iri shuri, imiryango yabo ndetse n’abarimu bababaye hafi mu rugendo rwabo rw’uburezi.

Byaranzwe n’imyidagaduro itandukanye irimo imbyino gakondo zitozwa muri Green Hills Academy, umuziki nyarwanda ndetse n’ikorwa ry’indirimbo zifashishije ibikoresho bya muzika bya kizungu. Hagati muri ibyo byose, hatanzwe ubutumwa bwo gushimira, gushimwa no kugirwa inama n’ababyeyi ndetse n’abayobozi.

Umuyobozi wa Green Hills Academy, Dr. Daniel Hollinger, yibukije abarangije ko agaciro k’intsinzi yabo katagomba gupimirwa gusa ku byo bagezeho ku giti cyabo, ahubwo no ku ruhare bagize mu guteza imbere abandi.

Yagize ati: “Intsinzi nyakuri igaragarira mu nyungu mwagejeje ku bandi. Mwamaze gutanga umusanzu ukomeye mu kubaka Isi irushijeho kuba nziza binyuze mu mishinga yanyu ifasha sosiyete no gukemura ibibazo bitandukanye. Ndizera ko muzakomeza muri uwo murongo.”

Perezida w’Inama y’Ubutegetsi ya Green Hills Academy, Faustin Mbundu, yashimye Madamu Jeannette Kagame ku ruhare rukomeye yagize mu gushinga no guteza imbere iri shuri, agaragaza ko umusanzu we wagize uruhare rukomeye mu iterambere ryaryo.

Yanashishikarije abanyeshuri barangije gukomeza kurangwa n’umurava, umuhate n’ubwitange mu rugendo rushya batangiye. Yagize ati: “Ndifuriza aba banyeshuri ko uyu munsi ubabera intangiriro y’indi ntego nshya, ukabatera imbaraga zo gukomeza guharanira ibyiza no gutsinda mu byo bazakora byose. Mujye mwizera ko umurimo ukoranwa umwete n’ubwitange ugira umusaruro, kandi ko gukora cyane bihora bihemberwa.”