Mu ijoro ryo ku wa 17 Nyakanga 2024, Komisiyo y’Igihugu y’Amatora, NEC, yatangaje ko iby’ibanze byavuye mu ibarura ry’amajwi y’Abadepite 53 batorwa mu buryo butaziguye. Mu batoye bagera kuri 96.7%, byagaragaje ko Umuryango FPR Inkotanyi n’indi mitwe ya Politiki itanu bafatanyije ari yo PDC, PPC, PSR, PSP na UDPR, batowe ku majwi 62.67%.
Umutwe wa politiki waje ku mwanya wa kabiri ni Ishyaka Riharanira ukwishyira ukizana kwa buri muntu [PL], ryagize 10.97% bingana n’abarishyigigikiye bagera kuri (...)

Sponsored Ad

Mu ijoro ryo ku wa 17 Nyakanga 2024, Komisiyo y’Igihugu y’Amatora, NEC, yatangaje ko iby’ibanze byavuye mu ibarura ry’amajwi y’Abadepite 53 batorwa mu buryo butaziguye. Mu batoye bagera kuri 96.7%, byagaragaje ko Umuryango FPR Inkotanyi n’indi mitwe ya Politiki itanu bafatanyije ari yo PDC, PPC, PSR, PSP na UDPR, batowe ku majwi 62.67%.

Umutwe wa politiki waje ku mwanya wa kabiri ni Ishyaka Riharanira ukwishyira ukizana kwa buri muntu [PL], ryagize 10.97% bingana n’abarishyigigikiye bagera kuri 957,602. Rikurikirwa n’Ishyaka riharanira Demokarasi n’Imibereho myiza y’Abaturage [PSD] ryatowe na 827,182 bingana na 9.48%.

Nyuma yo kwegukana intsinzi y’amajwi menshi nyuma ya FPR-Inkotanyi, nka IGIHE twaganiriye na Perezida w’Ishyaka rya PL, Mukabalisa Donatille, atugaragariza ibanga ry’intsinzi, ingamba nshya zo kwinjirana mu Nteko Ishinga Amategeko, Umutwe w’Abadepite mu Rwanda ndetse anakomoza ku hazaza h’iri Shyaka abereye Umuyobozi.

IGIHE: Ishyaka ryanyu ryabaye irya kabiri, rigize amajwi 10.97% mwabyakiriye mute?

Ni ibintu twakiriye neza cyane, ndashimira Ubuyobozi bw’Igihugu cyacu haba mu mitegurire no mu gihe cyo kwiyamamaza no mu gihe cy’amatora. Ni ibintu ubona ko byateguwe neza ku rwego rw’igihugu ariko na none no ku rwego rw’ishyaka ryacu.

Mu bihe byo kwiyamamaza byari biteguye neza, nta bakandida bigeze bagonganira ahantu hamwe, ndabishimira inzego zose bireba. Urwo ni urwego tuvuga rugeze ahantu hashimishije cyane rwa demokarasi mu gihugu cyacu. Abaturage baje kumva imigabo n’imigambi, baza kumva abiyamamazaga kugira ngo bazahitemo bakurikije abo babona bafite imigambi myiza ibanogeye kandi ifite aho izabageza.

Ibyo byose byabaye mu mutekano, amahoro, ubwisanzure ndetse n’ibikorwa by’amatora nyirizina aho ubona twagaragaje ubudasa bw’Abanyarwanda kuko ibiba mu Rwanda nta handi wabibona ku Isi. Ndashimira n’Abanyarwanda baduhundagajemo amajwi nk’Ishyaka PL hafi 11%.

Ni ibitugaragariza ko dufite inshingano zo kugira ngo dukore cyane muri bwa bufatanye dusanganywe nk’Abanyarwanda.

IGIHE: Ni ibiki mubona byabafashije kugera kuri uyu mwanya?

Ikintu cyadufashije ni ukwitegura neza, gutegura ibintu byose mbere no gushyira hamwe, no kureba uburyo bwiza bwatuma tubasha kugera ku Banyarwanda benshi mu gihe gito ibyumweru bitatu. Ntitwashoboraga kujya hose, ariko aho twageze twishimira ko abaturage baje, ariko twanakoresheje ikoranabuhanga, nk’imbuga nkoranyambaga kandi nizera ko byatanze umusaruro.

IGIHE: Ni izihe ngamba mwiteguye kwinjirana mu Nteko Ishinga Amategeko?

Inshingano z’Inteko Ishinga Amategeko, ni ugushyiraho amategeko no kugenzura ibikorwa bya Guverinoma, byose bikorwa mu izina ry’Abanyarwanda duhagarariye kuko nk’uko Itegeko Nshinga ryacu ribiteganya. iyo ugeze mu Nteko ntabwo uba ugihagarariye abagutoye, cyangwa umutwe wa politiki wagutanzemo umukandida, ahubwo uba ufite inshingano zo kureba inyungu rusange z’Abanyarwanda bose.

Tukareba ibyo bakeneye byihutirwa kurenza ibindi, uburyo byakorwamo, n’iki twakora kugira ngo tubashye kugera aho twifuza igihugu ko kigera nk’Abanyarwanda muri rusange . Abadepite bazaba bari mu Nteko Ishinga Amategeko bazajya babikora mu izina ry’Abanyarwanda bose.

Imigambi rero tujyanyemo ni ukureba inyungu z’Abanyarwanda bose, ni ukuvuga ngo abadapite bagomba kureba ibyo Abanyarwanda bakeneye, aho bakeneye kugera noneho tukareba uburyo bwakoreshwa kugira ngo abantu bagere ku ntego biyemeje muri iyi gahunda ya Guverinoma y’imyaka itanu iri imbere.

IGIHE: Ni ayahe masomo mwize azarushaho gufasha Ishyaka ryanyu gutera imbere?

Ni ugushyira hamwe kuko ‘abishyize hamwe ntakibananira’. Iyo turebye aho twavuye, aho tugeze uyu munsi n’aho tugana abenshi birabagora kubyumva kubona aho twari turi mu 1994 igihugu cyarasenyutse, Abanyarwanda bongeye kubaka ubumwe bwabo bongera gukorera hamwe kugira ngo tubashe kongera kubaka u Rwanda rwari rwarasenyutse.

Icyo twumva twize ni ubwo bufatanye, ni iyo mikoranire myiza, ni uko gushaka buri gihe ibisubizo biciye mu biganiro nk’uko biri mu mahame remezo twiyemeje nk’Abanyarwanda mu Itegeko Nshinga, gushyira hamwe abantu bareba icyerekezo kimwe ni intego dushaka kugeraho twese.

IGIHE: Ni ubuhe butumwa mwagenera abayoboke b’Ishyaka rya PL?

Ni ugukomeza gusigasira ibyo twagezeho haba ku rwego rw’Ishyaka PL, ndetse no ku rwego rw’igihugu kuko inshingano z’umutwe wa politiki ni ukubaka igihugu.

Ariko hari n’ibyo twifuza kugeraho tugomba kongeramo umuvuduko kugira ngo tubigereho mu buryo bwihuse kandi bunoze.

IGIHE: Ni ibiki muri gukora kugira ngo murusheho kwigarurira urubyiruko?

Uruyiruko ni imbaraga zubaka igihugu, ni abayobozi b’uyu munsi kandi b’ejo hazaza, twatangiye rero gushyira ingufu mu rubyiruko, kubongerera ubushobozi haba ku rwego rw’Ishyaka n’izindi nzego, aho ari hose imbaraga turi kuzishyira mu rubyiruko kugira ngo rubashe gutegurwa neza.

Ariko hari n’abandi bari mu nshingano kandi bakiri n’urubyiruko bakora imirimo myiza dushima, ni ugukomeza kubaha inshingano, urubuga rw’ibitekerezo n’urw’ibikorwa kugira ngo nabo bumve ko bafite inshingano zo gukorera igihugu cyacu ari ubu no mu gihe kizaza ndetse batozwe n’uko bazabiraga abazabakurikira.

source ;igihe