Madamu Jeannette Kagame, washinze Umuryango Imbuto Foundation, yafunguye ku mugaragaro Imbuto Hub, igikorwaremezo cyubatswe n’uwo muryango mu Karere ka Bugesera, Umurenge wa Nyamata, kigamije guteza imbere imibereho myiza y’abaturage binyuze mu kubagezaho serivisi zitandukanye zirimo uburezi, ubuzima, amahugurwa y’imyuga, siporo no kwita ku bana bato.

Icyo gikorwa remezo cyubatswe mu rwego rwo kwizihiza imyaka 25 Umuryango Imbuto Foundation umaze uteza imbere imibereho y’Abanyarwanda mu nzego zitandukanye ahogifite ubushobozi bwo kwakira abanyeshuri 200 buri munsi, mu gihe isomero ryacyo rishobora gukoreshwa n’abagera kuri 960, kandi gifite ishami ritanga serivisi z’ubuzima, rikaba ryita ku baturage bagera kuri 750.

Ku bijyanye no guteza imbere ubumenyi n’imyuga, urubyiruko rugera ku 117 ruzajya ruhahererwa amahugurwa atandukanye arimo ubudozi, kogosha, ubwiza no gusuka imisatsi, mudasobwa n’indi myuga ibafasha kwihangira imirimo.

Imbuto Hub ifite kandi Urugo Mbonezamikurire y’Abana Bato (ECD) ruzajya rwita ku bana bagera ku 1 402, hagamijwe kubafasha gukura neza no kubategurira amashuri.

Iki gikorwaremezo kandi kirimo isomero ryagenewe abana, aho gukorera imyitozo ngororamubiri, ndetse n’ahagenewe abageze mu zabukuru bakinira ibikorwa bitandukanye birimo imikino gakondo nk’amakarita n’igisoro.

Mu rwego rwo guteza imbere ubuzima n’imibereho myiza, harimo ahatangirwa ubujyanama n’ubuvuzi bw’ibanze, aho abaturage basuzumwa indwara zitandukanye ndetse bagahabwa serivisi zijyanye no kuboneza urubyaro.

Imbuto Hub ifite icyanya cyahariwe imikino itandukanye irimo Football, Volleyball, Basketball, Karate n’indi mikino y’amaboko, bigamije guteza imbere impano no gushishikariza abaturage gukora siporo.

Umuyobozi w’Akarere ka Bugesera, Mutabazi Richard yashimye Imbuto Foundation kuba yarubatse Imbuto Hub kuko igiye gufasha abana n’urubyiruko gukuza impano zabo no kwidagadura.

Yashimye Madamu Jeannette Kagame kuba Imbuto Hub yaratangirijwe muri ako Karere kandi yizeza no kubungabunga icyo gikorwa remezo.

Yagize ati: “Iki kigo ni umusaruro w’ubufatanye bwahereye mu byo abana n’urubyiruko bakeneye, bigeza ku iyubakwa ry’ibikorwa remezo, integanya nyigisho n’ibibuga by’imikino dufite.”

Biteganyijwe ko ibikorwa remezo nk’iki Imbuto Hub cyafunguwe mu Karere ka Bugesera yari imaze amezi atatu yaratangiye gukora, Imbuto Foundation izakomeza no kubyubaka no mu tundi turere tw’Igihugu. Kugeza ubu Imbuto Hub irimo kubakwa mu Turere twa Muhanga, Rwamagana, Kicukiro na Gasabo.