Minisitiri w’Ubumwe bw’Abanyarwanda n’Inshingano Mboneragihugu Bizimana Jean Damascene, yagarutse ku bugome bwaranze Gatete Jean Baptiste wari Burugumesitiri wa Komini Murambi, wayoboye ubwicanyi bw’indengakamere bwakorewe Abatutsi muri Segiteri Rwankuba mu mwaka wa 1991.

Sponsored Ad

Mu gikorwa cyo kwibuka ku nshuro ya 31 Jenoside yakorewe Abatutsi mu 1994 cyabereye ku Rwibutso rwa Jenoside rwa Kiziguro mu yahoze ari Komini Murambi, Minisitiri Dr. Bizimana yagarutse ku bugome bw’uwo muyobozi wicishije Abatutsi guhera mu mwaka wa 1991.

Urwibutso rwa Kiziguro ni kimwe mu bihanya bidashidikanywaho ku bukana bwa Jenoside yakorewe Abatutsi mu yahoze ari Komini Murambi, kuko rushyinguwemo imibiri y’Abatutsi 20.162, biyongeyeho indi mibiri 21 bashyinguwemo kuri uyu
wa 11 Mata 2025.

Bizimana yahamije ko Burugumesitiri Gatete yabeshyeye Abatutsi ko basuzugura ishyaka rya MRND ryayoboraga igihugu ashingiye ku ngengabitekerezo y’urwango yamusabitse, yimakajwe n’ubutegetsi bw’u Rwanda kuva mu 1959.

Icyo gihe Politiki yavugaga ko Igihugu ari icy’Abahutu, bityo Abatutsi ari abanyamahanga, kandi ko Abahutu n’Abatutsi badashobora kubana.

Akomeza agira ati: “Aha muri Murambi, Abatutsi b’i Rwankuba barishwe guhera mu 1991. Abavuga ko ryari igerageza rya Jenoside si byo kuko Jenoside ni ubwicanyi bushingiye ku kurimbura abafite icyo bahuriyeho ari byo byakorwaga icyo gihe, aho abafatwaga bakanicwa hashingirwaga kukuba ari abatutsi. Jenoside rero yabaye karundura muri 94 ariko aha inaha n’ahandi mu gihugu yari yaratangiye.”

Kuri iyi taliki ya 11 Mata mu 1994 ni bwo abari bahungiye muri Kiriziya ya Kiziguro bagabweho ibitero byayobowe na Burugumesiriri Gatete abasirikare n’Interahamwe hicwa Abatutsi benshi bajya kujugunwa mu rwobo rurerure rwaje kugirwa Urwibutso rwa Kiziguro.

Minisitiri Dr. Bizimana yasabye ko abantu bemera gukoresha ukuri kuko kuzafasha abarokotse gukira kugafasha abagize uruhare mu kwica abaturanyi babo gukira.

Ati: “Kugirango dukire dukoreshe ukuri. Bifasha ababuze ababo kwiyakira no gukomera. Ababishe n’abo icyabakiza ni uguca bugufi bakavuga ukuri kutagoreka ibyabaye, bagasaba imbabazi z’ibyo bakoze. Ukuri kuzatuma ntawuyobya abana turi kubyara. Abarezi mutinyuke mwigishe aya mateka kuko yabayeho nta mpamvu yo kuyahunga. Ukuri tugukomereho kandi tuguharanire.”

Umuyobozi wa Ibuka mu Karere ka Gatsibo Sibomana Jean Nepo, yavuze ko abarokokeye i Kiziguro ari abahamya b’uko Inkotanyi zaje kurokora zitaje kubica nkuko bikwirakwizwa n’abagoreka amateka.

Yakomeje agaragaza ko mu rwobo rw’ahubatswe Urwibutso rwa Kiziguro rwajugunywemo abantu barimo n’ababaga bakiri bazima baje kurokorwa n’inkotanyi, muri 11 barokowe kuri ubu hakaba hakiriho batanu.