Nyuma y’uko Urukiko rw’Ibanze rwa Nyarugenge rwiyambuye ububasha bwo kuburanisha urubanza ruregwamo umunyamategeko akaba n’Umuhesha w’Inkiko w’Umwuga, Me Munyakaragwe Aline, wise ‘igikuri’ Ingabire Nelly usanzwe ufite ubumuga bw’ubugufi bukabije kuko bigize icyaha cy’ivangura, Ubushinjacyaha bwamaze gutanga ikirego mu Rukiko Rwisumbuye rwa Nyarugenge.

Iradukunda Nelly yashyikirije Ubushinjacyaha ikirego arega Me Munyakaragwe Aline, amushinja kumukorera ivangura no kumuvugaho amagambo amutesha agaciro, harimo kumwita "igikuri", ijambo avuga ko rifitanye isano n’ubumuga bwe bw’ubugufi bukabije.

Mu iburanisha ryabanje, Nelly wari wiyambaje urukiko asaba indishyi, yatanze inzitizi agaragaza ko amagambo yavuzwe na Me Munyakaragwe atagomba gufatwa nk’icyaha cyo gutukana mu ruhame, ahubwo ko akwiye kubarwa nk’icyaha cy’ivangura.

Yasobanuye ko ayo magambo yamusigiye ihungabana rikomeye ndetse ko yari agamije kumuharabika ashingiye ku miterere y’umubiri we.

Amakuru yagejejwe mu rukiko agaragaza ko ayo magambo yavuzwe mu gihe Me Munyakaragwe yari yagiye gushyira mu bikorwa icyemezo cy’urukiko kijyanye n’urubanza rw’izungura rw’umuryango wa Ingabire. Ageze aho umutungo wari uherereye, yahamagaye ushinzwe umutekano mu mudugudu amwereka aho ari agira ati: "Ndi kwa cya gikuri cy’igikire."

Mu ikirego cyabanje, Ubushinjacyaha bwari bwasabye Urukiko rw’Ibanze rwa Nyarugenge guhamya Me Munyakaragwe icyaha cyo gutukana mu ruhame no kumuhanisha igifungo cy’amezi abiri hamwe n’ihazabu y’ibihumbi 200 Frw.

Ku ruhande rwe, Me Munyakaragwe yahakanye ibyaha aregwa, avuga ko nta cyaha yakoze kandi ko nta gihano cyakagombye gutangwa, asaba ko ibyifuzo by’Ubushinjacyaha byateshwa agaciro.

Icyakora, mu mwanzuro warwo, Urukiko rw’Ibanze rwa Nyarugenge rwemeje ko rudafite ububasha bwo kuburanisha uru rubanza, rushingiye ku nzitizi yari yatanzwe n’uruhande ruregera indishyi.

Urukiko rwagaragaje ko ibikorwa biregwa Me Munyakaragwe bishobora kuba bigize icyaha cy’ivangura aho kuba icyo gutukana mu ruhame. Kubera ko icyaha cy’ivangura kiri mu byaha bikomeye, urubanza rwahise rwoherezwa mu Rukiko Rwisumbuye rwa Nyarugenge kugira ngo ari rwo ruruburanisha.

Ingingo ya 163 y’Itegeko riteganya ibyaha n’ibihano mu Rwanda ivuga ko umuntu uvutsa undi uburenganzira cyangwa akamukorera ivangura ashingiye ku nkomoko, ubwoko, ibara ry’uruhu, igitsina, akarere, idini, ibitekerezo bya politiki, imibereho, ubumuga bw’umubiri cyangwa bwo mu mutwe, cyangwa isura y’umubiri, aba akoze icyaha.

Iyo gihamijwe n’urukiko, uwagikoze ashobora guhanishwa igifungo kiri hagati y’imyaka itanu n’irindwi, ndetse akanacibwa ihazabu iri hagati y’ibihumbi 500 Frw na miliyoni 1 Frw.

Kuri ubu, Ubushinjacyaha bwamaze kuregera Urukiko Rwisumbuye rwa Nyarugenge, rukaba rwaramaze kwakira dosiye nubwo itariki y’iburanisha itaratangazwa.

Hagati aho, uruhande rwa Iradukunda Nelly rwamaze kwandikira uru rukiko rusaba ko urubanza rwahabwa itariki ya vuba kugira ngo rutangire kuburanishwa.

Nelly yavuze ko yishimiye intambwe imaze guterwa muri uru rubanza, agaragaza icyizere ko azabona ubutabera ashaka.

SRC: Igihe