RSSB Tigers BBC yatsinze APR BBC amanota 78-68, APR WBBC itsinda REG WBBC amanota 75-62 zombi zegukana ‘FERWABA Super Cup 2026, yakinwaga ku nshuro ya kabiri.

Imikino yombi yabereye muri BK Arena mu ijoro ryo ku wa Gatanu, tariki ya 6 Gashyantare 2026.

Iki gikombe gihuza ikipe yegukanye Shampiyona n’iyegukanye Rwanda Cup. Mu bagabo APR BBC yegukanye Igikombe cya Shampiyona ya 2024-25 na RSSB Tigers yegukanye Rwanda Cup 2025.

Ni mu gihe mu bagore wahuje REG WBBC yegukanye ibikombe byombi na APR WBBC bahuriye ku mukino wa nyuma.

Tigers BBC ni yo yatangiye neza umukino ndetse yegukana agace ka mbere ku manota 25-22, aka kabiri umukino wegeranye cyane bituma amakipe yombi anganya amanota 22-22, ariko Tigers isoza igice cya mbere iyoboye umukino n’amanota 47 kuri 44 ya APR BBC.

Mu gace ka gatatu, Tigers yongeye imbaraga nyinshi izamura ikinyuranyo itsinda aka gace ku manota 69 kuri 54 ya APR BBC mu gihe aka kane katsinzwe na APR BBC ku manota 14-9.

Umukino warangiye RSSB Tigers BBC yatsinze APR BBC amanota 78-68 yegukana FERWABA Super Cup yakinwaga ku nshuro ya kabiri.

Umunya-Kenya Albert Odero wakinnye umukino we wa mbere muri Tigers ni we watsinze amanota menshi (20) muri uyu mukino, akurikirwa na bagenzi be bakinana ari bo Paul Bizimungu na Antino Jackson batsinze amanota 14.

Mu bagore iki gikombe cyegukanywe na APR WBBC yatsinze REG WBBC amanota 75-62.

Shampiyona ya 2026 izatangira ku Cyumweru, tariki ya 8 Gashyantare.