Kuri uyu wa 13 Nyakanga 2026, Umuyobozi mukuru wa Polisi y’u Rwanda (IGP), CG Felix Namuhoranye, yasabye abapolisi bitegura kujya mu butumwa bw’umuryango w’abibumbye bwo kubungabunga amahoro muri Repubulika ya Santrafurika (MINUSCA) gukomeza kuzamura ibendera ry’u Rwanda bakora kinyamwuga nk’uko bisanzwe.

Ubutumwa bwahawe abapolisi bagera kuri 420 bagize amatsinda atatu; RWAFPU1 rigizwe n’abapolisi 140 bayobowe na Senior Superintendent (SSP) Aimable Busasa, itsinda rya RWAFPU2 rigizwe n’abapolisi 140 bayobowe na Senior Superintendent (SSP) Jean Paul Dominique Nkurunziza, n’itsinda RWAPSU rigizwe n’abapolisi 140 bayobowe na Senior Superintendent (SSP) Patrick Gashabuka.

Aba bose bakaba bitegura kujya gusimbura bagenzi babo bamaze igihe cy’umwaka bakorera mu gihugu cya Santrafurika.

IGP Namuhoranye yabasabye kuzakomeza kubaka izina ry’u Rwanda bakora neza, barangwa n’ubunyamwuga kugira ngo barusheho kuzamura ibendera ryarwo ku isi hose.

Yagize ati: “Mugiye ahantu dufite impamvu nyinshi zo kujyayo, isi yose iziko igihugu cyacu kiza ku isonga mu butumwa bwo kubungabunga amahoro n’umutekano by’umwihariko abaturage b’abasivili barimo ababa mu nkambi z’abavanywe mu byabo n’ibindi bikorwa bitandukanye bikorerwa muri ubwo butumwa. Murasabwa rero kuzahagararira u Rwanda neza murushaho kuruhesha ishema mu ruhando mpuzamahanga.”

Yababwiye ko ibyo bagenzi babo bababanjirije bakoze kandi byiza bitazabananira ahubwo ko bagomba kuzakora ibyiza kurushaho kuko babifitiye ubushobozi n’ubushake.

Yagize ati: “Mugiye ku karubanda aho abantu bose bazi neza ko abababanjirije bakoze neza, uburyo muzitwara nibyo bizatuma u Rwanda rurushaho gukomeza kugirirwa icyizere, ntimuzabe arimwe rero mugabanya icyo cyizere rufitiwe. Ntihazagire ukora ikosa arigambiriye cyangwa arigizemo uruhare kuko hari amakosa yo kwirindwa.”

IGP Namuhoranye yabasabye kuzafata neza ibikoresho byaba ibyabo kugiti cyabo n’ibyarusange ndetse no kuzabana neza n’abanyamahanga bazaba bakorana bubaha imico n’imigirire yabo.

Kuva mu mwaka wa 2014, nibwo u Rwanda rwatangiye kohereza abapolisi mu butumwa bwo kubungabunga amahoro n’umutekano muri Repubulika ya Santrafurika, aho kuri ubu rufite imitwe ine y’abapolisi bakorera mu bice bitandukanye by’igihugu, ari byo; Bangui, Bangassou na Kaga Bandoro.