Umukuru w’Igihugu Paul Kagame yageze i Baku muri Azerbaijan kuri uyu wa Kabiri tariki 12 Ugushyingo 2024, aho yifatanije n’abandi bakuru b’ibihugu ku Isi mu nama ya mbere nini y’Umuryango w’Abibumbye yiga ku mihindagurikire y’ibihe (UN Climate Change Conference, COP29).

Sponsored Ad

Ni inama Perezida wa Repubulika Paul Kagame aza kugiriramo ibiganiro bishingiye ku mubano w’ibihugu bikaba byitezwe ko aganira n’abayobozi batandukanye barimo na Perezida Ilham Aliyev wa Azerbaijan wakiriye iyi nama ya COP29.

Inama mpuzamahanga y’amasezerano ku mihindagurikire y’ibihe izwi nka COP (‘Conference of the Parties’), iraza kuganira ku mahirwe akomeye yo kwihutisha ingamba zo guhangana n’imihindagurikire y’ikirere iterwa ubushyuhe bwinshi ku Isi.

COP29 irahuza abayobozi ba guverinoma, ubucuruzi n’imiryango itegamiye kuri Leta kugira ngo bashakire hamwe ibisubizo bifatika ku kibazo cy’imihindagurikire y’ikirere.

Iyi nama kandi iribanda ku bijyanye n’imari, mu gihe hakenewe amamiliyaridi y’amadolari kugira ngo ibihugu bigabanye cyane ibyuka bihumanya ikirere kandi birinde ingaruka mbi zaterwa n’imihindagurikire y’ikirere.

Inama mpuzamahanga y’amasezerano ku mihindagurikire y’ibihe izwi nka COP (‘Conference of the Parties’) iba buri mwaka guhera mu 1995, muri uyu mwaka wa 2024 igiye kuba ku nshuro ya 29 ikaba ihuza ibihugu bitandukanye byo ku Isi kugira ngo biganire ku bibazo byerekeye imihindagurikire y’ibihe.