Perezida Kagame yashimiye gahunda ya Covax kuri uyu munsi u Rwanda rwakiriye inkingo za mbere 240,000 za AstraZeneca zatanzwe binyuze muri iyi gahunda.

Izindi nkingo 102,960 zo mu bwoko bwa Pfizer ziragera mu Rwanda uyu mugoroba. Kuri uyu wa kane, izi nkingo zizoherezwa mu bigo nderabuzima 508 biherereye hirya no hino mu gihugu.

Mu butumwa yanyujije kuri Twitter ye,Perezida Kagame yashimiye Covax ati "Ni inkuru nziza kuba inkingo za Covid-19 zageze muri Afurika guhera muri Ghana...no muri iki gitondo mu Rwanda n’ahandi.Mwakoze cyane COVAX.

Mu mpera z’ukwezi gushyize,Perezida Kagame yanenze uburyo ibihugu bikize bikomeje kwikubira inkingo za Covid-19, mu gihe hari ibihugu bikiri mu nzira y’Amajyambere bitarazibona kandi isi ikwiriye gufatanya kurwanya icyo cyorezo kugira ngo gicike burundu.

Ibi yabivuze nyuma y’ubusabe bw’Umuyobozi Mukuru w’Umuryango Mpuzamahanga wita ku buzima (OMS), Dr Tedros Adhanom Ghebreyesus, wavuze ko icyorezo cya Covid-19 kitahashywa nta bufatanye bubayeho hagati y’ibihugu.

Covax ni gahunda ishyigikiwe na UN/ONU yahurije hamwe ibihugu bikagura inkingo ku nganda zazikoze hagamijwe cyane cyane kuzigeza ku bihugu bidafite amikoro yo kuzigurira ku isoko.

Iyi gahunda iteganya gutanga doze miliyari ebyiri ku bihugu 190 mu gihe kitarenze umwaka.

Minisiteri y’Ubuzima yatangaje ko izo doze z’inkingo zose u Rwanda rwahawe na Covax zizaterwa abantu 171, 480 bashyizwe mu cyiciro cy’abafite ibyago byinshi, mu gihe gukingira bitangira ku wa gatanu w’iki cyumweru.

Muri gahunda ya Covax, izi ni doze z’inkingo za AstraZeneca ibihugu byo mu karere bizakira, ku rutonde rw’agateganyo rwatangajwe na WHO/OMS mu kwezi gushize:

DR Congo: 6,948,000
Kenya: 4,176,000
Rwanda: 1,098,960 (AstraZeneca na Pfizer)
South Sudan: 864,000
Uganda: 3,552,000

Mu kwezi gushize, u Rwanda rwakingiye abantu rukoresheje inkingo bivugwa ko ari iza Pfizer, zari "doze nkeya rwabonye mu bufatanye mpuzamahanga", nk’uko byavuzwe na minisiteri y’ubuzima.