U Rwanda na Azerbaijan byasinyanye amasezerano y’imikoranire mu nzego eshanu zirimo ubuhinzi, uburezi, ubwikorezi bwo mu kirere, ubucuruzi n’imitangire ya serivisi mu nzego z’ubuyobozi.

Aya masezerano yashyiriweho umukono i Baku, kuri uyu wa Gatandatu, ahagarariwe na Perezida Kagame na mugenzi we wa Azerbaijan, Ilham Aliyev.

Kuri uyu wa Gatandatu, ni bwo Perezida Kagame w’Igihugu uri mu ruzinduko rw’iminsi itatu i Baku yakiriwe na mugenzi we wa Azerbaijan, Ilham Aliyev, bagirana ibiganiro byihariye byagarutse ku mikoranire ihuriweho n’ibihugu byombi mu nzego zitandukanye.

Mbere y’uko hasinwa aya masezerano, Perezida Kagame yasuye Urwibutso rwa Alley of Honor, yunamira Heydar Aliyev, wabaye perezida wa gatatu w’iki gihugu na Zarifa Aliyeva wari umugore we.

Umukuru w’Igihugu yanashyize indabo ku rwibutso rw’intwari zitangiye guhesha Azerbaijan ubwigenge n’ubusugire bwayo.