Ikigo cy’Igihugu cy’Ibarurishamibare, NISR, cyatangaje ko ibiciro by’ibikorerwa mu nganda zo mu Rwanda byazamutseho 4,8% muri Mutarama 2026, ugereranyije n’uko byari bihagaze muri Mutarama 2025.

Raporo yashyizwe hanze ku wa 2 Werurwe 2026 igaragaza ko byatewe ahanini n’izamuka rya 20,4% ry’ibiciro by’inganda zitunganya amabuye y’agaciro, izamuka rya 2,5% ry’ibiciro byo mu nganda zikora ibintu bitandukanye ndetse n’izamuka rya 34,8% by’ibiciro by’amashanyarazi.

Ugereranyije Mutarama 2026 n’Ukuboza 2025, ibiciro byo mu nganda byazamutseho 1,1%.

NISR isobanura ko byatewe n’izamuka rya 1,2% ry’ibiciro byo mu nganda zikora ibintu bitandukanye.

Muri Mutarama 2026, ibiciro byo mu nganda zikora ibicururizwa imbere mu gihugu byazamutseho 2,8% ugereranyije na Mutarama 2025.

NISR iti “Ibi byatewe ahanini n’izamuka rya 0,2% ry’ibiciro byo mu nganda zikora ibintu bitandukanye ndetse n’izamuka rya 34,8% by’ibiciro by’amashanyarazi.”

Ibiciro byo mu nganda ku bicuruzwa byoherezwa hanze y’igihugu byazamutseho 15,3% ugereranyije na Mutarama 2025.

Bisobanurwa ko byatewe n’izamuka rya 20,4% ry’ibiciro byo mu nganda zitunganya amabuye y’agaciro ndetse n’izamuka rya 5,2% ry’ibiciro byo mu nganda zikora ibintu bitandukanye.

Ugereranyije Mutarama 2026 n’Ukuboza 2025, ibiciro byo mu nganda ku bicuruzwa byoherezwa mumahanga byagabanutseho 1,3%, bitewe n’igabanyuka rya 3,1% ry’ibiciro byo mu nganda zikora ibintu bitandukanye.