Ikigo cy’Igihugu cy’Ibarurishamibare, NISR, cyatangaje ko mu Ugushyingo 2025, ibiciro rusange by’ibikorerwa mu nganda byazamutseho 3,4%, ugereranyije n’Ugushyingo 2024.

Ni ibyatangajwe muri raporo ngarukakwezi ku ihindagurika ry’ibiciro mu nganda mu Rwanda yasohowe ku wa 8 Mutarama 2026.

Ibi byatewe n’izamuka ry’ibiciro byo mu nganda zitunganya amabuye y’agaciro ndetse n’izamuka ry’ibiciro by’amashanyarazi.

Ugereranyije Ugushyingo 2025 n’Ukwakira 2025, ibiciro byo mu nganda byazamutseho 0,2%. Ibi byatewe ahanini n’izamuka rya 4,8% ry’ibiciro byo mu nganda zitunganya amabuye y’agaciro.

Ibiciro byo mu nganda zikora ibicururizwa imbere mu gihugu, mu Ugushyingo 2025, byazamutseho 3,3% ugereranyije n’Ugushyingo 2024.

Ni mu gihe ugereranyije Ugushyingo 2025 n’Ukwakira 2025, ibiciro by’ibikorerwa mu nganda ku bicuruzwa imbere mu gihugu bitahindutse.

Ku rundi ruhande ariko ibiciro byo mu nganda ku bicuruzwa byoherezwa hanze y’igihugu byazamutseho 5,3% ugereranyije n’Ugushyingo 2024.

Ibi byatewe ahanini n’izamuka ry’ibiciro byo mu nganda zitunganya icyayi n’ikawa byazamutseho 16,6%. Ugereranyije Ugushyingo 2025 n’Ukwakira 2025, ibiciro byo mu nganda kuri ibyo bicuruzwa byoherezwa hanze byazamutseho 2%.

Nubwo bimeze bityo ariko NISR, igaragaza ko Urwego rw’Inganda mu gihugu rwazamutseho 10,3% mu Ugushyingo 2025 ugereranyije n’ukwezi nk’uko mu mwaka wari wabanje mu gihe igipimo rusange cy’uburyo rwagiye ruzamuka cyari kuri 6,3% ku mwaka.
Mu ngeri zazamutse cyane harimo ubucukuzi bw’amabuye y’agaciro bwazamutseho 4,1%, gutunganya ibintu mu nganda byazamutseho 4,9%, amashanyarazi azamukaho 14,1% mu gihe ibijyanye n’amazi n’isukura byazamutseho 6,6%.

Ku bijyanye n’ibitunganyirizwa mu nganda byazamutseho 4,9%, iri zamuka ryatewe ahanini n’izamuka ryo gutunganya ibinyobwa hamwe n’itabi byazamutseho 1,8% mu gihe ibijyanye no gutunganya ibikoresho birimo ibya plastique byazamutse kuri 2,6%.

Ku rundi ruhande, gutunganya ibitambaro, impu n’ibindi byagabanyutseho 7,5% mu gihe gutunganya imbaho n’impapuro hamwe n’ibijyanye n’icapiro byagabanyutseho 6,0%.