Ikigo cy’Igihugu cy’Ibarurishamibare, NISR, cyatangaje ko ibiciro ku masoko byazamutse ku rugero rwa 8,9% muri Mutarama 2026 ugereranyije na Mutarama 2025.

Ni mu gihe ibiciro byazamutseho 8% ugereranyije na Ukuboza 2025.

Muri Mutarama 2026, ibiciro mu mijyi byiyongereyeho 8,9% ugereranyije na Mutarama 2025, mu gihe byari byiyongereyeho 8% mu Ukuboza 2025.

Iyi raporo igaragaza ko muri Mutarama 2026, ibiciro byiyongereye bitewe n’ibiciro by’ibiribwa n’ibinyobwa bidasembuye byiyongereyeho 5,3%, ibiciro by’ibinyobwa bisembuye n’itabi byiyongereyeho 15,6%, ibiciro by’inzu, amazi, amashanyarazi, gazi n’ibindi bicanwa byiyongereyeho 10,5%, ibiciro by’ibijyanye n’ubuvuzi byiyongereyeho 71,1%.

Ibiciro by’ibijyanye n’ubwikorezi byiyongereyeho 8,6% n’ibiciro by’amafunguro n’icumbi byiyongereyeho 19,2%.

Ugereranyije Mutarama 2026 n’Ukuboza 2025, ibiciro byiyongereyeho 1,3%. Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 1,5%, ibiciro by’inzu, amazi, amashanyarazi, gazi n’ibindi bicanwa byiyongereyeho 2% n’ibiciro by’amafunguro n’icumbi byiyongereyeho 5%.

Ugereranyije Mutarama 2026 na Mutarama 2025, ibiciro by’ibintu bitarimo ibiribwa n’ibikomoka ku ngufu byiyongereyeho 8,9%.

NISR igaragaza igipimo ngenderwaho cyifashishwa mu bukungu bw’u Rwanda kiboneka hifashishijwe gusa ibiciro byakusanyijwe mu mijyi.

Iyi raporo igaragaza ko muri Mutarama 2026, ibiciro mu byaro byiyongereyeho 6,5% ugereranyije na Mutarama 2025. Mu Ukuboza 2025 byari byiyongereyeho 3,3%.

Bimwe mu byatumye ibiciro byiyongera muri Mutarama 2026 ni ibiciro by’ibiribwa n’ibinyobwa bidasembuye byiyongereyeho 5,3%, ibiciro by’ibinyobwa bisembuye n’itabi byiyongereyeho 14,6% n’ibiciro by’amafunguro n’icumbi byiyongereyeho 16,9%.

Ugereranyije Mutarama 2026 n’Ukuboza 2025, ibiciro byiyongereyeho 0,1%. Iri zamuka ryatewe ahanini n’ibiciro by’amafunguro n’icumbi byiyongereyeho 2,9%.