Urukiko rw’i Paris mu Bufaransa kuri uyu wa Mbere, itariki 07 Ukwakira 2024 rwatangiye kuburanisha urubanza ruregwamo umwanditsi w’Umunyakameruni ufite ubwenegihugu bw’u Bufaransa, Charles Onana ushinjwa guhakana Jenoside yakorewe Abatutsi mu 1994.

Sponsored Ad

Charles Onana areganwa Umufaransa, Damien Sirieix, uyobora inzu y’ibitabo ya Artilleur yamufashije gusohora ibitabo.

Uyu mwanditsi ashinjwa guhakana Jenoside yakorewe Abatutsi no kubiba inzangano abinyujije mu gitabo yise "Rwanda, la vérité sur l’opération Turquoise: Quand les archives parlent" cy’impapuro zirenga 600.

Iki gitabo cyagiye ahagaragara ku itariki ya 30 Ukwakira 2019, nicyo cyabaye intandaro yo kujyanwa mu nkiko n’amashyirahamwe arindwi arwanya guhakana jenoside ari yo:

Collectif des parties civiles pour le Rwanda
IBUKA (ishami ryo mu Bufaransa)
Ligue internationale des droits de l’homme
Fédération internationale des droits de l’homme
Association de lutte contre le racisme et l’antisémitisme
Ishyirahamwe ry’Abanyarwanda baba mu Bufaransa
N’ishyirahamwe ry’abarokotse jenoside zabaye ku Isi, Survie

Kuri uyu wa Mbere, umutekano wari ucunzwe bikomeye n’abapolisi basaga 50 baryamiye amajanja hanze n’imbere mu rukiko kubera ubwinshi bw’abantu bari barwitabiriye nk’uko BBC yabyanditse.

Mu bantu 500 bari itabiriye uru rubanza biganjemo Abanyekongo, Igipolisi cy’u Bufaransa cyemereye abatarenga 150 gukurikira urwo rubanza kubera icyumba cy’urukiko cyabaye gito, abandi bashyirwa ahandi hantu aho basimburanaga mu kwinjira mu cyumba cy’urukiko buri minota 30.