Ikigo cy’Igihugu cy’Imisoro n’Amahoro (RRA) cyatangaje ko mu mwaka w’isoresha wa 2024/2025 cyakusanyije miliyari 3.079,8 Frw z’imisoro, yarenzeho 1,3% kuri miliyari 3.041,2 Frw cyateganyaga gukusanya.

Ibyo byatangarijwe mu kiganiro RRA yagiranye n’abanyamakuru kuri uyu wa 8 Nyakanga, ku ishusho y’imisoro n’isoresha mu mwaka w’ingengo y’imari warangiranye na Kamena 2025.

Komiseri Mukuru wa RRA, Niwenshuti Ronald, yasobanuye ko imisoro yakusanyijwe mu mwaka wa 2024/2025 yiyongereyeho 16,7%, kuko mu 2023/2024 hari harakusanyijwe miliyari 2619.2 Frw.

RRA yasobanuye ko miliyari 3.079,8 Frw z’imisoro yakusanyijwe mu 2024/2025 zingana na 52,9% by’ingengo y’imari igihugu cyakoresheje muri uwo mwaka.

Iby’ibanze byafashije RRA gukusanya uyu musoro ni ubukangurambaga bwo gukoresha ikoranabuhanga ry’imashini za EBM, izatanzwe zageze ku 147.700 zivuye ku 117.631 zatanzwe mu 2023/2024.

Mu bacuruzi bashya bazihawe, abagera kuri 44.000 bahise bandikwa mu batanga umusoro ku nyongeragaciro (TVA) bavuye kuri 32.529 bari banditswe 2023/2024.

Hari kandi gahunda yo kwigaragaza ku bushake yafashije RRA gukusanya miliyari 18,1 Frw kuko abigaragaje ku bushake bose mu 2024/2025 ari 5.328.

Gukusanya imisoro ingana ityo kandi byagizwemo uruhare no kwiyongera kw’ibitumizwa mu mahanga mu 2024/2025 kuko byazamutseho 21,9% ugereranyije na 16,3% byari biteganyijwe.

Hari kandi ibikorwa byo kurwanya magendu byafashije RRA gukusanya miliyari 14,6 Frw ndetse no kwishyuza ibirarane by’imisoro byayifashije kwishyuza ibigera kuri miliyari 278 Frw.

RRA yasobanuye ko izamuka ry’ubukungu ku gipimo cya 8,0% hagati ya Nyakanga 2024 na Werurwe 2025, cyarenze 7,6% cyari giteganyijwe, na byo byagize uruhare mu bwiyongere bw’imisoro yakusanyijwe.

Mu mwaka w’ingengo y’imari wa 2025/2026, RRA ifite intego yo gukusanya miliyari 3.628 Frw z’imisoro, ingana na 53% by’ingengo y’imari ya miliyari 7.032,5 Frw izakoreshwa muri uyu mwaka watangiranye na Nyakanga 2025.

Niwenshuti yavuze ko mu mwaka w’ingengo y’imari wa 2024/2025, RRA iteganya kongera ingufu mu nzego zirimo intege nke mu gutanga imisoro harimo inganda zikora ibintu bitandukanye no mu bwubatsi.

Ati “Nko mu bwubatsi harimo ibikoresho byinshi bakoresha usanga bidatangirwa inyemezabuguzi ariko harimo n’abandi barimo batazwi, nk’abacuruzi ariko bacuruza muri ruriya rwego. Hari kandi n’ibigo bifasha kumenyekanisha imisoro muri gasutamo usanga byagaragaje ibiciro bitari byo n’aho dusanga byarahimbye inyemezabuguzi.”

Yavuze ko kugira ngo RRA igere kuri iyo ntego, iteganya gushyira imbaraga mu kurwanya magendu kuko ziri mu zikorerwamo inyerezwa ry’imisoro ndetse no kongera ikoreshwa ry’ikoranabuhanga.

Ati “Turashaka gukoresha ikoranabuhanga dusanganywe ariko twongereho n’irindi rishya harimo irijyanye no gukusanya imisoro kuri za gasutamo ndetse no kongera imbaraga mu ikoreshwa rya EBM kugira ngo kuzikoresha byorohe kurushaho ariko hajyemo n’uburyo bwo kuzigenzura, bidufashe mu imenyekanisha ry’umusoro ugomba gutangwa.”