Abaturage bo mu Karere ka Rwamagana barasabira ibihano biremereye bamwe muri bagenzi babo bakigaragaza ingengabitekerezo ya Jenoside harimo ibikorwa byibasira abarokotse Jenoside yakorewe Abatutsi.

Ibi barabivuga mu gihe tariki 13 uku kwezi, Umusaza witwa Sibomana Emmanuel warokotse Jenoside yishwe akubiswe ipiki n’umuntu ukekwa wanamaze gutabwa muri yombi.

Ku mugoroba wo kuwa Gatanu ahagana saa moya z’umugoroba, nibwo Sibomana Emmanuel warokotse Jenoside yakorewe Abatutsi yishwe akubiswe ipiki mu Mudugudu wa Abakina Akagali ka Ruhimbi mu Murenge wa Gishari mu Karere ka Rwamagana.

Yamwishe amaze kubwira uwitwa Ndoli David amagambo yuzuyemo ingengabitekerezo ya Jenoside amusanze iwe.

Uretse uru rupfu rwakorewe Sibomana Emmanuel, rwaje rwiyongera ku bindi bikorwa byibasira abarokotse Jenoside yakorewe Abatutsi.

Ibikorwa nk’ibi byibasira abarokotse Jenoside ngo bitoneka ibikomere byabo ku buryo byakoma mu nkokora gahunda y’ubumwe n’ubudaheranwa, nk’uko uhagarariye IBUKA muri Rwamagana, Dative Musabyeyezu yabisobanuye.

Ubwo yagarukaga ku bikorwa by’ubwicanyi byibasira abarokotse Jenoside yakorewe Abatutsi bimaze igihe bigaragara hirya no hino mu gihugu, Perezida Paul Kagame yatangaje ko ibi bikorwa bigomba guhagarara mu buryo bwihutirwa.

Yabigarutseho ubwo yakiraga indahiro za Perezida na visi perezida b’Urukiko rw’Ikirenge ku wa Kane w’iki Cyumweru.

Sibomana Emmanuel yarokokeye Jenoside yakorewe Abatutsi mu Karere ka Nyaruguru, nyuma nibwo yaje gutura i Rwamagana.

Urupfu rwe ruje rukurikira urwa Nduwamungu Pauline wo mu Murenge wa Rukumberi wishwe aciwe umutwe mu kwezi gushize.