Urukiko Rwisumbuye rwa Nyarugenge rugiye kuburanisha Ubujurire ku ifunga n’ifungurwa ry’agateganyo, mu rubanza rwa Shema Arnaud uzwi nka DJ Toxxyk uregwa ibyaha birimo ubwicanyi budaturutse ku bushake.

Biteganyijwe ko urubanza rwe mu Bujurire ruzaba ku wa 4 Gashyantare 2026, nyuma yo kujurira icyemezo cy’Urukiko rw’Ibanze rwa Nyarugenge rwanzuye ko afungwa iminsi 30 y’agateganyo bitewe n’uko hari impamvu zikomeye zituma akekwaho ibyaha bitatu muri bine akurikiranyweho.

Umucamanza yasobanuye ko Shema agiye gufungwa by’agateganyo kugira ngo atabangamira iperereza rikomeje no kugira ngo adatoroka ubutabera.

Urukiko rwagaragaje ko hari impamvu zikomeye zituma afungwa iminsi 30 y’agateganyo kuko mu byaha bine Ubushinjacyaha bumukurikiranyeho bitatu muri byo bifite impamvu zikomeye.

Mu iburanisha ryo ku itariki 14 Mutarama 2026, Ubushinjacyaha bwagaragaje ko Shema Arnaud bumukurikiranyeho icyaha cy’ubwicanyi budaturutse ku bushake, guhunga nyuma yo gukora cyangwa guteza impanuka, gukoresha ibiyobyabwenge cyangwa urusobe rwabyo ndetse no kwanga gupimishwa icyuma gipima ingano ya alcool mu mubiri.

Icyo gihe Shema yaburanye yemera icyaha cy’ubwicanyi budaturutse ku bushake ndetse n’icyaha cyo guhunga nyuma yo gukora cyangwa guteza impanuka gusa agaragaza ko yabitewe n’ubwoba bigatuma ahita ahungira ku nshuti ye i Karongi.

Urukiko rwagaragaje ko nyuma yo gusuzuma ibyo byaha byose Ubushinjacyaha bwagaragaje, rwasanze koko hari impamvu zikomeye zituma abikurikiranwaho uretse icyo kwanga gupimwa n’icyuma gipima ingano ya alcool mu mubiri.

Urukiko rwagaragaje ko nta bimenyetso bifatika bigaragaza ko DJ Toxxyk yanze gupimishwa icyo cyuma gipima ingano ya alcool mu mubiri kuko aho yafatiwe i Karongi nta kintu na kimwe yigeze yanga mu byo yasabwe.

Ku cyaha cyo gukoresha ibiyobyabwenge cyangwa urusobe rwabyo, urukiko rwashimangiye ko hari impamvu zikomeye zituma akomeza kugikurikiranywaho kuko hari inyandiko y’Urwego rw’Ubugenzacyaha Shema yashyizeho umukono yiyemerera ko yakoreshaga ibiyobyabwenge.

Ikindi ni uko mu iperereza ryakozwe hari ibiyobyabwenge byasanzwe iwe mu rugo rungana n’amagarama abiri bityo rutesha agaciro impamvu yatangaga agaragaza ko ibyo biyobyabwenge atazi uko byageze iwe.

DJ Toxxyk waburanye asaba kurekurwa agakurikiranwa ari hanze, ntiyanyuzwe n’imikirize y’urubanza kuko atifuzaga ko yafungwa bituma ajurira mu Rukiko Rwisumbuye rwa Nyarugenge.

Shema Arnaud yatawe muri yombi ku itariki 21 Ukuboza 2025 nyuma y’uko imodoka yari atwaye igongeye Umupolisi ahazwi nko kuri Peage mu Mujyi wa Kigali akitaba Imana.

Kuri ubu, Shema afungiwe mu Igororero rya Nyarugenge riherereye i Mageragere guhera ku wa 21 Mutarama 2025, Urukiko rw’Ibanze rwa Nyarugenge rwategeka ko afungwa by’agateganyo.