Urukiko Rwisumbuye rwa Gasabo rwaburanishije urubanza ruregwamo umuganga n’umugore we w’umuforomokazi bakurikiranyweho kwica umwana w’umukobwa wigeze kubakorera, ndetse akabyarana na shebuja, bamuhora gukeka ko ari we waba yararoze nyirabuja uburwayi yararwaye.

Umugambi wo kumwica wapanzwe n’abaregwa, bashaka agatsiko k’abantu bazica uwo mukobwa. Ku itariki ya 05/08/2024 nibwo bamwishe bamuteye icyuma mu ijosi nk’uko bitangazwa n’Ubushinjacyaha Bukuru.

Abaregwa bakurikiranyweho ibyaha bikurikira:

Icyaha cyo gushyiraho umutwe w’abagizi ba nabi cg kuwujyamo giteganywa kandi kigahanishwa ingingo ya 224 y’itegekono 68/2018 ryo ku wa 30/08/2018 riteganya ibyaha n’ibihano muri rusange.

Icyaha cy’ubwicanyi bukozwe ku bushake giteganywa kandi kigahanishwa ingingo ya 107 y’ Itegeko no 68/2018 ryo ku wa 30/08/2018 riteganya ibyaha n’ibihano muri rusange.

Icyaha cyo gucura umugambi wo gukora icyaha giteganywa kandi kigahanishwa ingingo ya 20 y’ Itegeko no 68/2018 ryo ku wa 30/08/2018 riteganya ibyaha n’ibihano muri rusange.

Urukiko rwahaye Ubushinjacyaha umwanya wo gusobanura imikorere y’icyaha, no kugaragaza uruhare rwa buri wese ndetse n’ibihano busabira buri wese; abaregwa nabo bahabwa umwanya wo kwisobanura ku byo baregwa.

Urubanza rukaba rwapfundikiwe rukazasomwa tariki ya 22/02/2025.