Ubushinjacyaha bwasabiye Uwihoreye wamenyekanye nka Ndimbati gufungwa imyaka 25.Araregwa guha umwana inzoga no kumusambanya.
Ubushinjacyaha bwasabiye Ndimbati guhamwa n’ibyaha akurikiranyweho agafungwa imyaka 25 y’igifungo, kuko ibyaha akurikiranyweho bigize impurirane y’ibyaha mbonezamugambi.
Mu rukiko rwisumbuye rwa Nyarugenge habereye urubanza mu mizi rwa Uwihoreye Jean Bosco ’Ndimbati’ ukurikiranyweho ibyaha byo guha umwana inzoga no gusambanya umwana bikekwa ko yakoreye uwitwa (…)

Ubushinjacyaha bwasabiye Uwihoreye wamenyekanye nka Ndimbati gufungwa imyaka 25.Araregwa guha umwana inzoga no kumusambanya.

Ubushinjacyaha bwasabiye Ndimbati guhamwa n’ibyaha akurikiranyweho agafungwa imyaka 25 y’igifungo, kuko ibyaha akurikiranyweho bigize impurirane y’ibyaha mbonezamugambi.

Mu rukiko rwisumbuye rwa Nyarugenge habereye urubanza mu mizi rwa Uwihoreye Jean Bosco ’Ndimbati’ ukurikiranyweho ibyaha byo guha umwana inzoga no gusambanya umwana bikekwa ko yakoreye uwitwa Kabahizi Fridaus.

Ubushinjacyaha busobanura ko mu mpera z’umwaka wa 2019,Uwihoreye yasindishije Kabahizi arangije aramusambanya. Buvuga ko yabikoze amwizeza kuzamwinjiza mu bakinyi ba sinema.

Ni urubanza rwatangiye kuburanishwa ariko Ndimbati wagombaga kugezwa ku rukiko aburanira ku ikoranabuhanga kuko atigeze ashyirwa mu bagomba gusohoka muri gereza ya Mageragere afungiyemo.

Urubanza mu mizi rwaburanishijwe hifashishijwe uburyo bw’ikoranabuhanga, aho Ndimbati yarukurikiranye kuri SKYPE, naho mu rukiko akaba yari ahagarariwe n’umwunganira mu mategeko,Me Bayisabe Irene.

Icyumba cyari cyakubise cyuzuye. Benshi mu bakurikiraga urubanza bari biganjemo abakinanaga amafilimi n’Uwihoreye , abafana be ndetse n’itangazamakuru ryiganjemo iryo ku muyoboro wa youtube.

Ubushinjacyaha bushingira ku mvugo za Kabahizi , abo yakoreraga n’ababyeyi be bemeza ko yavutse mu kwezi kwa Gatandatu kwa 2002. Buvuga ko n’ifishi yo kwa muganga bakingirijeho Kabahizi igaragaza ko Uwihoreye yamusambanyije atarageza imyaka y’ubukure. Nyuma yo guhura na we Kabahizi yabyaye abana b’impanga.

Mu kwiregura, Ndimbati yemeye ko yabyaranye n’uwo mukobwa ariko avuga ko baryamanye yujuje imyaka y’ubukure bityo ko ibindi birego aregwa bishingiye ku kagambane kabayeho k’abifuzaga kumuharabika.

Uwihoreye yakunze kwikoma umushinjacyaha ko mu magambo ye “bumushinja ibinyoma”. Yavuze ko ibyabaye byose bishingira ku kagambane yakorewe.

Avuga ko nyuma yo kumenya ko Kabahizi atwite yamwitayeho no kugeza abyaye.

Avuga ko hari abagiye mu matwi Kabahizi bamwumvisha ko yakura miliyoni eshanu z’amafaranga kuwo babyaranye , akanamutegeka kumukodeshereza inzu itari munsi y’i 300,000.

Yikomye umwe mu banyamakuru bo ku murongo wa YouTube ko yamuhamagaye amusaba ko yamuha miliyoni ebyiri kugira ngo amubikire ibanga uregwa arabyanga. Byose akavuga ko bigamije kumuhindanyiriza izina.

Ikindi Uwihoreye n’umwunganira mu mategeko bireguza bavuga ko ku ifishi y’inkingo handitseho icyiciro cy’ubudehe umuryango we ubarizwamo , umudugudu aturukamo, ko yakingiwe indwara ya Hepatite kandi ibyo byose mu mwaka yavutsemo bitari byakabayeho. Baravuga ko ibimenyetso bimushinja ari ‘ibicurano’.

Abaregera indishyi mu rubanza basabye miliyoni 30.Bahagarariye se w’uwasambanyijwe, Nsabimana Faustin.

Uwunganira Ndimbati aribaza uko nyiri ubwite ataje kwisabira indishyi cyane ko yujuje imyama y’ubukure.

Ndimbati we yasabye kugirwa umwere akajya kurera abana be yabyaranye na Kabahizi Fridaus ari kuzira.

Umunyamategeko wa Ndimbati yavuze ko uyu mugabo adakwiye gufungwa kuko nta bimenyetso bifatika byerekana ko yakoze ibyaha akurikiranyweho, asaba ko mu gufata umwanzuro w’Urukiko hazarebwa no ku nyungu z’abana aba bombi babyaranye.

Avuga ko gufunga uwo yunganira impanga yabyaranye na Kabahizi ari zo zizabirenganiramo kandi nta ruhare zagize mu byabaye.

Niba nta gihindutse umucamanza azafata icyemezo ku itariki ya 29 z’uku kwezi.