Urukiko rw’Ibanze rwa Gasabo kuri uyu wa Gatatu tariki ya 20 Ukwakira rwateye utwatsi ubujurire bwa Tumukunde Epiphanie uzwi nka Kabebe wahoze afite akabyiniro k’abambaye ubusa na bagenzi be.

Sponsored Ad

Urukiko mu mwanzuro w’ubujurire rwasomye kuri uyu wa 20 Ugushyingo, rwavuze ko ubujurire bwa Kabebe na bagenzi be bane nta shingiro bufite, rutegeka ko bakomeza gukurikiranwa bafunzwe by’agateganyo.

Ku wa 27 Nzeri 2024 ni bwoTumukunde yakatiwe n’Urukiko rw’Ibanze rwa Gasabo gufungwa iminsi 30 y’agateganyo icyakora ku wa 1 Ukwakira 2024 aza kujuririra iki cyemezo.

Uyu mugore ni nyiri akabari kabarizwaga i Remera kari kamaze kubaka izina ryo kubyiniramo inkumi zambaye ubusa buri buri, icyakora muri Kanama ubwo inzego zishinzwe umutekano zabimenyaga zahise zimuta muri yombi nako karafungwa.

Ubwo yaburanaga ku ifunga n’ifungurwa ry’agateganyo ubushinjacyaha bwagaragaje ko mu kabari ke yari afitemo ibyumba bitatu byakorerwagamo ubusambanyi , kuko hari abakobwa bazaga bakabyinira abagabo bambaye ubusa, hanyuma umugabo ugize ubushake agahitamo umukobwa bajyana gusambana, bakishyura Tumukunde Epiphanie n’uwo mukobwa.

Uregwa na bagenzi be bireguye bavuga ko babyinaga bambaye amasutiye, gusa ubushinjacyaha bwabitesheje agaciro buvuga ko atari byo, bijyanye no kuba hari za Videwo zirahari zigaragaza abakobwa babyina bambaye ubusa ndetse banikora mu myanya y’ibanga.

Kuri Mukamazimpaka Assoumpta wari usanzwe akorera Tumukunde muri ’Comptoir’ y’akabari ke, ubushijacyaha bwavuze ko mu byagaragaye muri message yohererezanyaga Tumukunde harimo aho yamubwiraga ngo "ntucane amatara atukura, adatuma dufatwa".

Mukamazimpaka mu kwiregura kwe yavuze ko yari asanzwe ari umukozi kandi ko ntaho ahuriye n’ibyakorerwaga muri kariya kabari, dore ko we yakoraga muri Comptoir, ibyo yahereyeho asaba ko urukiko rwamubabari kuko afite umuryango wo kwitaho.

Kuri Nshimiyimana Hussein, Didider Nyirishema na Jean Claude Uwihanganye bari basanzwe ari abakozi bashinzwe umutekano muri ako kabari baregwa ubufatanyacyaha, ubushinjacyaha bwagaragaje ko iyo hazaga umuntu basanzwe batamenyereye babanzaga kubaza Nyirabuja, kugira ngo abemerere ko uwo muntu yinjira.

Ni mu gihe Hussein yabaga ari mu kabari hagati agenzura abashobora kuba bafata video cyangwa amafoto.

Ikindi ngo aba bashinzwe umutekano mu bipimo byafashwe byagaragaye ko banywa Ibiyobyabwenge.

Tumukunde ubwo yahabwaga umwanya wo kwiregura ku mashuhso y’abambaye ubusa yagaraye, yahakanye ko atafatiwe iwe.

Ati: "Nigute Video yagaraje ababyina ntigaragaze abicaye mu kabari cyangwa abahagaze?"

Umwe mu bari bashinzwe umutekano mu kwiregura kwe yemeye icyaha cyo gukoresha urumogi, gusa akavuga ko yarunywaga nk’umuti wa Kinyarwanda yari yararangiwe n’umuvuzi gakondo.

Ku bijyanye n’abakobwa babyinaga mu kabari bambaye ubusa uyu yavuze ko nyirabuja yabishyuraga Frw 10,000 kuri buri umwe, asaba urukiko kumurekura kuko afite aho abarizwa atacika ubutabera akaba yatanga ingwate.

Tumukunde na bagenzi be bakurikiranweho ibyaha birimo gushakira inyungu mu mibonano mpuzabitsina y’undi, icy’iyezandonke ndetse n’icyo gufatanwa ibiyobyabwenge.

SOURCE; BWIZA.COM