Urukiko rw’Ibanze rwa Gasabo rwategetse ko umuyobozi wa Koperative icuruza ibikoresho by’ubwubatsi ikorera mu Gakinjiro mu Murenge wa Gisozi mu Karere ka Gasabo (COPCOM), Kamonyo Bahenda André, ukurikiranyweho kwakira indonke no konona umutungo wa Koperative afungwa iminsi 30 y’agateganyo.

Urukiko rwemeje ko hari impamvu zikomeye zituma Kamonyo Andre akekwaho icyaha cyo gukoresha nabi umutungo ufitiye rubanda akamaro n’icyaha cyo gusaba no kwakira indonke.

Rwemeje kandi ko hari impamvu zikomeye zituma David Nyirigira wari umugenzuzi w’imari imbere muri Koperative akekwaho icyaha cyo kuba icyitso mu cyaha cyo kwakira indonke.

Urukiko rw’Ibanze rwanemeje ko hari impamvu zikomeye zituma Umuyobozi w’Uruganda rwa IYAGA PAINTS rwari rwahawe isoko, Gashumba Ronad akekwaho icyaha cyo gukoresha nabi umutungo ufitiye rubanda akamaro n’icyaha cyo gutanga indonke.

Kamonyo yatawe muri yombi, akekwaho kunyereza arenga miliyoni 20 Frw mu itangwa ry’isoko ryo kuvugurura inyubako za COPCOM.

Urukiko rwategetse ko Kamonyo Andre, Gashumba Ronald na David Nyirigira bafungwa by’agateganyo mu minsi 30 y’agateganyo mu Igororero.

Gusaba, kwakira cyangwa gutanga indonke ni icyaha giteganywa n’ingingo ya kane y’itegeko nimero 54/2018 ryo ku wa 13 Kanama 2018 ryerekeye kurwanya ruswa.

Uhamijwe n’Urukiko iki cyaha, ahanishwa igifungo kitari munsi y’imyaka itanu ariko kitarenze irindwi n’ihazabu yikubye inshuro ziri hagatu y’eshatu n’eshanu z’agaciro k’indonke yatse cyangwa yakiriye.

Ku rundi ruhande, icyaha cyo gukoresha nabi umutungo gihanishwa igihano cy’igifungo kiri hagati y’imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi ya miliyoni 3 Frw ariko atarenze miliyoni 5 Frw.